其實警隊開個專頁黎把鬼？（毛言地）

今時今日要係面書開專頁毫無難度，就好似我兩年前屎忽痕都可以開返個毛言地。但係你開得專頁，SET得比大家留言，一早就要預左一定有同你意見相反嘅人，特別係依家嘅香港警察。你開個專頁目的又話係多啲同市民交流，又話用黎聽下意見講下新消息，但又一大堆聲明依樣唔比、果樣唔比咁。明知自己個朵臭，但你又要搞網上公關，一方面話聽意見，另一方面又唔比人鬧，咁樣嘅警隊專頁其實要黎做乜？

話咩提高警隊正面形像，所以所有對警隊有負面評論嘅都會刪除，又事先靠嚇咁話你留言留得衰隨時犯法拉鬼埋你。咁怕比人鬧，咁點解仲要比多個渠道我地班市民向你「表達意見」？係人都知大家最關心嘅就係七警同朱警司依兩單野，但係你就話依兩件事之前已經交代過唔會再講。大佬，就係你之前講到一舊屎咁，我地聽唔明先會再問，即係我上堂嘅時候老師講完我唔明都會舉手叫老師講多次，唔通老師就同我講「我教完啦，我唔會再重複」啦喎？連問下都唔比，霸道到咁學乜鬼人地扮親民？

形像依樣野唔係話唔比人講你壞話就代表你係好。好嘅你唔禁都冇人話，唔好嘅大家實搵到方法屌你，依個係三歲細路都明嘅道理。好人好姐開完個專頁講到明會刪留言，網民字都未開始打，你就已經知道佢地想屌你，即係你自己都知你有幾咁受人「歡迎」。黎生話見到警隊專頁有三萬幾個讚好開心，我唔講「買LIKE」依個行為住，我根據返政府最鍾意既邏輯，你得三萬幾個讚，代表全香港仲有七百幾萬人唔鍾意你啊陰公。而且睇返維基嘅資料，香港有近三萬八千個警察，而係我落筆果陣警隊個專頁既LIKE數四萬未到。身為警察我諗最少有一半人會LIKE返自己啦好冇？淨係個專頁其實有近半LIKE嘅人都係自己友，而真心撐警嘅原來得萬九條友；反而陳奕迅一個人都有成百二萬LIKE，警隊你知唔知醜？

為咗唔比人話，就一味靠嚇，咁嘅行為其實同黑社會冇分別，不過冇黑社會會咁蠢開個面書專頁咁解。你請人返黎唔係答問題，淨係刪留言，網民想知嘅你唔答，你講嘅野又冇人想知。其實警隊個專頁仲有乜野作用？不如學網上果張江澤民圖咁講：執柒左佢喇！

作者：毛言地（本文章由聚言時報授權提供）