【食譜】不一樣的佬味！豉椒牛肉陳村粉

近日天氣好熱，要堅持煮飯都唔係容易。

有時都會煮得簡單啲，一湯一個碟頭飯甚至湯飯。

昨晚食豉椒牛肉陳村粉，豉椒牛肉典型茶記食物。

大少爺非常鍾意食，今次用陳村粉因為我鍾意。

陳村粉索汁能夠強，每樣有汁食物停留晌佢身上都會非常好味。

圖中碟加辣椒係我同大少爺，包包另有無辣椒版佢食到不停叫我下次再煮。

臭包除了樣子連口味都同daddy一樣咁佬。

不得不提街外牛肉好多時都加鬆肉粉，而自己整唔需要加任何鬆肉粉都可以嫩滑的！

材料：

牛肉         $50

洋蔥        半個

青椒        1個

陳村粉    1斤

汁料：

豆豉        1.5茶匙

生抽        1湯匙

糖            1茶匙

老抽        1茶匙

鹽          少許

水            1碗

*以上汁料材料撈勻

另備...…生粉水

做法：

1. 牛肉買返來先醃味

2. 先加少少水落牛肉撈勻，再加糖1茶匙撈勻，再加少少生抽再撈勻

3. 再加片粟粉/生粉，最後要加少少油撈勻，放入雪櫃半小時等佢入味啲

4. 陳村粉攤開，用水略為沖一沖，唔好開咁大水好易爛（沖一沖好喇！唔好浸！）

5. 然後蒸5分鐘，唔好蒸太耐

6. 燒熱鑊同油，要好熱好熱

7. 就放入牛肉炒到半熟上碟備用

8. 爆香洋蔥同青椒

9. 倒入汁料，開始滾時牛肉回鑊，最後加生粉水埋獻便完成