（網上圖片）
分久必合，合久必分。
WeChat入股Snapchat，聯想買Fujitsu，丸龜統一左譚仔同譚仔三哥米線。
一個想一統溝通程式、一個想一統電腦世界、另一個想一統各國食客個胃，尋找最大的市場發展，製造營運上最大的synergy，盡可能dominate整個market。
回想起，20年前，我仲讀緊中學，放學果陣，我成日都會去深水埗整碗米線做下午茶，單餸米線加杯野飲，19或者20蚊，超經濟實惠，如果肚餓，整碗過橋，都係30蚊多啲。自從有左譚仔之後，就去少左長沙灣天悅廣場附近果間雲南米線鋪，其實，果間應該先係比較正宗手法的雲南米線，不過，只係譚仔先將食物做到咁localized同標準化，愈開愈多店又做起左果brand，搞搞吓成為米線王者，仲一拆二，加埋有成超過100間鋪，最後仲比外資相中，收歸其下做集團一員，有機會成為打出香港的餐飲品牌，媲美台灣的鼎泰豐、香港的添好運。
唔知，將來會唔會有炸蝦、各式各樣的天婦羅米線呢？過橋米線又會唔會變成139蚊碗再加一呢？然後，再送多個腐皮卷雞翼？最重要的，係入店時果刻如果講日本式的歡迎語，咁就真係完完全全失去左譚仔的精神了，就好似去到澳牛門口有店員熱烈地用正常的歡迎語問你「先生，請問幾位」一樣，根本係扭曲左整間店、整個品牌的生命力、精神涵義。
一個品牌，拆為兩個品牌，各自獨立經營；最後，兩者卻竟然由第三者相繼買入，又再一次成為一家人。不過，呢次唔係自己人搞，要由外人搞呢！
唔知下一個會係邊個呢？可能係香港仔魚蛋粉，或者南記呢！不過，兩間都應該夠數自己搞IPO，點解呢刻要賣呢？背後可能仲有hidden agenda，deal中有deal，後著係咩，遲啲就知啦！
