（網上圖片）
唔理質素，只求交數。做生意，講道義；做人，講禮儀。宜家，有無問題？有so定無so先？你同個客做足pitch，三次又三次。但係，最終，佢亦都偷足你條橋。之後，又唔判返比你做。你有份做，不過，叫白做，一蚊都收唔到，你可以點。你同Mary由認識到出街到送禮到去旅行，由睇戲到睇演唱會由kate spade到LV由食french window到去左France呢度，四個月，足足成四個月，連世界杯都踢完嘞，但係你連個波皮都掂唔到，16強都入唔到呀，你可以點吖？
哈哈，我求其打個電話之嘛，排google頭版廣告有個做production house嘅傻佬，竟然上左嚟比左幾條免費橋嚟啊，嘩，勁正呀，真高質，連我同我老板都諗唔到呀！最緊要呀，竟然係免費呢！嘻嘻，我求其發個message之嘛，排係happn第三個嘅傻仔，竟然約我出街呀！又帶我睇戲、又帶我食好西，仲送禮物比我，同我去巴黎添呀！最緊要呀，竟然係免費呢，全包呀！真係爽呢！
亳無道理？噢，唔係啦！理所當然啦！因為，你要明白，多你一個唔多，少你一個唔少。其實，你咩都唔係。Vendor？對唔住，你唔係。男朋友，對唔住，你都唔係。你地只不過係個資源供應者，你畀野我咪要囉，唔畀足我咪走囉！不主動，不抗拒，不拒絕。永遠唔好高估你係人地心目中嘅位置。無價值，你咪死開啲囉！無錯，你是你本身的傳奇，個問題係，你並唔係其他人嘅傳奇呢，將來老尷嘅，都只會是你。 你是你本身的傳奇，係無錯，不過，阿Q精神啲吧！你估你係雷軍咩，佢就的的確確係傳奇嘞！睇住嘞，雷軍只係小前鋒、有任務嘅小傳奇，之後果啲，先係真真正正嘅大傳奇呀，唔，估吓先？佢地應該係姓馬嘅。
你就嚟結婚嘞。老婆靚，身材正，體貼又細心，所以你好開心。你好努力工作，買左個單位仔，長沙灣青山道，搞緊mortgage，開始裝修，仲搵緊啲相熟嘅interior designer幫你手。你宜家企左係旺角道，睇緊揀用邊隻磚嚟做個廚房地板，突然收到個message，你未婚妻話想同你分手，同你性格唔夾、你老母好煩、之前唔係你話會改都唔會信多你一次！所以，今晚出嚟要交待一吓。What？單日轉向？今朝都仲升緊成四百幾點，下午2點鐘出單野話大陸出招反美國貿易戰？唔買波音機？禁蘋果入口？所有美國農產品停售？嘩嘩嘩，OMG！WTF！幾分鐘跌左成千六點，加埋成兩千點來回呀大佬……於是，你早左成個鐘出到嚟，企住尖沙咀地鐵站R出口果個欄杆位，心諗，「點解會係我？」終於，你發左呆成個鐘，諗緊呢個超難答嘅哲學問題。你未婚妻出現，oh sorry，早一日都仲係嘅，宜家，叫「曾經」未婚妻。見到我，佢由遠處慢慢走左過嚟，係我耳邊講左幾句，然後，放低左條匙，就離開左嘞。我企左係原位，諗起呢四年幾嘅經歷，有起有跌，宜家個結果，係亳無道理？定理所當然呢？你又諗起，世界杯決賽，克羅地亞出盡力咁踢，最後都係輸左。小米上市好努力咁托住，之後都好似同幻想仲有啲距離。你打到個電話差唔多爆、個keyboard比你打到爛，都係買唔到黃子華。但係，網上黃牛兩千五，係有得賣嘅。你先發覺，有啲野，唔到你話想點就點，想用咩方法就可用咩方法達到呀！
然後，你問，然後，可以怎樣？無吖，咪面對現實囉！唔通你走去痛打果個唔肯比錢嘅客、搵你溝唔到嘅女仔回水、叫雷軍同你認錯呀？面對現實啦你，你係邊個啫？
