（網上圖片）
之前，做培訓workshop時，認識了很多新朋友、新同學，有一部份朋友，是做開網購、在Instagram賣野或者對做生意好有興趣，所以想來上堂聽聽又學吓野。不過，有些同學仔，心態只是來kill time，討論唔投入有時仲拒絕參與、功課又唔做足、出來做小組或個人presentation時又唔知講咩或者頻頻dead air。所以，我有時都唔明，咁辛苦來上堂，每次坐在課室成兩、三個鐘，加埋十次、八次，仲要畀學費，又要考核，計出席率，但到頭來又唔似係為左知識，過程中又無又唔肯去互動交流，咁究竟，點解仲要坐係班房呢？
有次上堂，踫到一位年青人，他同他的朋友，共有三位，一齊報名來上個workshop，開堂後，他們才姍姍來遲，我問佢，做咩咁遲呀？佢話，我地今朝都仲身在大陸，宜家專登趕返香港上堂，已經好畀足面架啦！放break時，我地吹開水，佢話宜家興e-learning，根本唔需要坐在一個特定地方上堂咁落後，仲有，平時睇video、上網睇書果陣，通通都係學緊野，要學，每秒都可以學；唔肯學，放幾多時間都無用。噢，我知點解有些導師話他們幾位唔合作啦，原來，雙方觀念根本完全唔同，兩個世界，係真係溝通唔到呀，唔係拒絕溝通咁簡單。你執著我遲到，我認為你無料到；你叫我坐定定，我話我可以flexible隨處走；你叫我學野聽野教我野，其實我可以完全自己試睇做，又或者你邊講邊做都得。
思想比較傳統的朋友，係永遠唔會接受這樣子的想法和互動模式。不過，當香港舊媒體王者要賣書，新媒體王者將要準備上市，這就是行業的變奏。
上堂、培訓，仲係唔係需要一定要求學員在特定時間、課室，坐定定係度比特定一位人兄單向式教授呢？起碼，我相信，這種模式會愈來愈唔work。因為，係宜家環境長大的年青人，都不是用這種模式來溝通的。
