病完幾日,今日好似放完大假咁係咁補番晒啲嘢。

上星期發高燒乜都做唔到,好介意無得煮比包包食。

攤晌床真係又辛苦又無奈,最慘係啲皮膚一日內變差..............

幸好呢幾日開始好番可以煮比包包食。

今日整了偽炸雞,個偽炸雞最特別之處唔係炸係焗。

以焗代炸我做過好多次,但色水要靚就係今次,真真正正金黃色。

個祕袂係將麵包糠炒一炒,炒到微黃色焗出來就會靚呢!

你睇下個臭包,啲菠菜放晌個盤到...…直到永遠,激死我!

而我就食偽雞柳配 Caesar salad。

做法:

1用大雞柳切片(我買有機的),然後加1/4-1/2茶匙鹽撈勻,可以加少少黑椒

2我會用1粒蒜頭磨蓉去醃雞肉,做出來香好多

3麵包糠大約半碗至一碗,用白鑊去炒

4邊炒邊兜勻

5預備 2湯匙麵粉及1隻蛋

6先將雞肉沾上麵粉,唔需要多但要均勻

7再沾上蛋漿,最後沾上麵包糠(無影到)

8將雞肉放上焗架!然後用175度焗 20-25分鐘(視乎焗爐火力而定)


 【食譜】好味又健康!小孩至愛:偽炸雞

 https://www.facebook.com/taisiu9