超級工程：羅馬是怎樣建成的V軍人王朝(1) 之羅馬鬥獸場/上（Zannanza）

文化

2016-06-01 |

2097

軍人皇帝掌權的弗拉維王朝 Flavian Dynasty (公元69年至公元96年)

弗拉維．維斯帕先(Vespasian, 公元69-79年在位)

弗拉維．提圖斯(Titus, 公元79-81年在位)

弗拉維．圖密善(Domitian, 公元81-96年在位)

歷史背景
記得上一季同大家講到尼祿(Nero)呢位暴君眾叛親離，下場以自殺告終，果年係公元68年。
尼祿死後，羅馬帝國陷入繼承混亂，公元68-69年一年之內出左四個企圖稱帝既軍人，歷史稱之為四帝之年。

但係響混亂之中，一位軍人皇帝將會從東方而起，重塑秩序，將帝國帶上巔峰，呢位就係維斯帕先(Vespasian)。

約瑟夫Josephus
大家應該仲記得猶太戰爭(The great Judean War)嘛？維斯帕先(Vespasian)本來係羅馬軍隊入面既將領，曾經響攻打不列顛尼亞(Britannia)有過軍功。猶太人起兵反叛羅馬統治既時候，維斯帕先受當時尼祿皇帝所命，同佢既大仔提圖斯(Titus)出兵平亂。響猶太戰爭初期，維斯帕先攻陷左加利利城(Galilee)，俘虜左當時城內既叛軍首領約瑟夫(Josephus)，亦即係後來既猶太藉歷史學者弗拉維．約瑟夫(Flavius Josephus)。謀逆大罪，本應難逃一死，但維斯帕先唔係咁睇。約瑟夫接受左維斯帕先既招安，並且預言猶太戰爭之所以爆發，係為維斯帕先將來做皇帝鋪路。當然，起初維斯帕先半信半疑，因為佢根本冇奧古斯都的皇室血統，又點可以做皇帝呢？但歷史既野就係咁有趣，因為維斯帕先將會自我實現呢個預言。

執掌大位
響尼祿最瘋狂既年代，維斯帕先遠離羅馬既權力中心，亦都遠離血腥既權鬥，專心響帝國東部打佢既猶太戰爭。結果佢打贏左，而呢個時候尼祿自殺既消息傳至。響呢段日子，羅馬城內既繼承陷入混亂，先後有四個軍隊將領自立為帝，但冇一個可以統治得長。就響呢個時候，維斯帕先挾猶太戰爭勝利既餘威出軍，同佢既政敵響沙場見面，咁當然係維斯帕先打贏左。於是響公元69年，維斯帕先獲得元老院承認接掌羅馬皇帝既位置，重新恢復羅馬政治秩序。

維斯帕先從猶大地獲得的巨額財富，將用作大興土木所需的資金。圖為提圖斯凱旋門上的浮雕：猶太戰爭中被羅馬兵奪作戰利品的七燈臺。

百廢待興
經過64年幾近摧毀整座羅馬城既大火，羅馬城元氣大傷，於是維斯帕先開始左重建羅馬既艱巨工作。佢大興土木，首先就係要剷除暴君尼祿既記憶，所以尼祿既皇宮金殿被埋。而維斯帕先將會用從耶路撒冷聖殿等地劫掠而得既財富，響金殿之上建造屬於人民而非暴君既宮殿，呢座建築從此以後將會成為羅馬城知名度最高既地標，為世人所銘記讚歎。

呢座建築既名字：弗拉維競技場(Flavian Amphitheater)
佢通俗既稱呼：羅馬鬥獸場(Colosseum)

羅馬鬥獸場 Colosseum (維斯帕先競技場 Vespasian Amphitheater)/上 (公元70-80年)

響今日既羅馬，鬥獸場(Colosseum)係最家喻戶曉既城市地標。去過羅馬既遊客，好多都會仰望鬥獸場而驚嘆古代建築師、工程師同匠人既鬼斧神工。鬥獸場成為羅馬文明曾經輝煌一時既憑據，但事實上，鬥獸場亦都有佢黑暗既一面。

野蠻的表演
可能大家都聽過金正恩「犬決」張成澤既傳聞，姑勿論呢個傳聞真偽，以飢餓既野獸既廝咬處決犯人既行刑方法其實正正就係古羅馬人所發明。響古羅馬時代既鬥獸場入面，5萬到8萬既觀眾會好樂意睇住場內既角鬥士(Gladiator)血戰至死。羅馬城既居民亦都好鐘意睇「犬決」，就好似我地今日去戲防院睇場戲一樣平常，當一邊老虎、獅子、野狼同死囚進行廝殺，另一邊數以萬計既觀眾歡呼吶喊。響古羅馬，「犬決」係極不光釆、極其羞辱既死法。通常都係社會底層既犯重罪者先會獲判呢種刑罰，而擁有完整公民權既羅馬公民法律上係擁有豁免權。大家唔會想像到坐響香港大球場或者紅館睇場咁樣既殺戮show係點既經歷，但響二千年前既羅馬帝國，呢一切都係日常生活入面好平常既事。正因為咁，鬥獸場展現左羅馬文化既矛盾：高度發達既文明同先進既科技水平、同時又極度推崇嗜血尚武既精神。響現代社會被認為係二元對立既文化，羅馬人反而覺得一d問題都冇，而鬥獸場就係文明同野蠻兩者既完美結合。

羅馬競技場中的鬥獸表演，電影《帝國驕雄》(Gladiator)劇照

競技場中的角鬥表演，主演羅素·克洛(Russell Crowe)，電影《帝國驕雄》(Gladiator)劇照

羅馬鬥獸場
好喇，言歸正轉，Amphitheater，或譯圓形競技場，係古希臘劇場(Theater)既後續發展，相當於將兩個半圓劇場拍埋一齊。圓形競技場以及裡面上演既各樣表演係羅馬文化既一部分，所以幾乎每個羅馬響行省建造既殖民城市都有圓形競技場，現存遺址就有230座。所以大家無論係去北非、西亞定歐洲旅行，到處都可以見到。當維斯帕先(Vespasian)登位之後既一年，佢掩埋左尼祿金殿(Domus Aurea)，準備興建一座全國最宏偉、最大既競技場。公元70年，維斯帕先競技場正式破土動工，競技場呈橢圓形，長189米、闊156米，高度48米，相當於14-15層樓高。鬥獸場集當時羅馬建築技術之大成，利用先建造石砌護土牆再灌入混凝土(pozzolana)平整出冬甩形既地基，單單係地基已經有12-13米深。建築主體同承重結構同樣採用左石灰岩同混凝土並用結構，非常堅固耐用。

鬥獸場地基形狀

觀眾席
鬥獸場建築結構由外至內主要分為周界545米既外圈牆、內圈牆同87米X55米既橢圓形舞臺三部分。由於現存既鬥獸場外牆局部倒塌，所以從君士坦丁凱旋門方向進入鬥獸場時，內圈套住外團牆身既結構清晰可見。外牆由三層拱廊組成，多層拱廊結構沿襲自水道橋既設計，可以方便減少建築物既重量，同時又能夠提供足夠的支撐。響古時候，三層既拱廊都陳列住精美的人像雕塑，而第三層既頂部就設有240根桅杆。響太陽曬既時候，1000名羅馬海軍既水手會拉起帆布天幕，等d觀眾唔會曬親，可以安坐座位食住花生等睇戲。

鬥獸場頂部既桅杆，用黎控制帆布天幕既收放

用作建築材料既10萬立方米石灰岩來自羅馬城30公里外既採石場，而建築物本身亦都另外使用左25萬立方米混凝土材料。建築主體完成後，工匠精心鋪砌飾面大理石板。飾面用總重8,000噸既大理石板，係利用總重300噸既鐵扣固定響建築上面。羅馬覆亡後，飾面大理石被拆落黎製造石灰，所以而家既鬥獸場表面上有一個個大小不一既凹洞，呢d本來係原先安裝鐵扣既地方。

古羅馬鬥獸場既內外兩圈，內圈上因為拆除鐵扣遺留落黎既坑孔清晰可見。原本呢d孔就係掛大理石飾板既地方，所以原來既鬥獸場建築應該係近大理石既乳白色而非而家見到既淺橙啡色。