大家好,又係我,早前因為情人節睇波搞到冇咗女朋友果位。雖然好痛,但身為李斯特迷嘅我見到愛隊順利殺入最後直路又覺得好興奮,漸漸失戀嘅傷痛就冇再影響到我。而且單身後嘅我可以場場波都追,仲由一開始得我一支公喺屋企用SOPCAST睇波,變到有一班突然球迷嘅朋友陪我由茶記睇到酒吧,再由酒吧睇到返佢屋企-真係睇波咁大把,貪零食任食又唔洗錢。

就喺一次睇波活動入面,有一個朋友帶多個新成員加入:佢個妹。問起佢點解會對李斯特城有興趣,佢居然話一開始以為大家講個華DEE即係劉德華,但睇睇下又覺得佢地踢得幾好睇唔多悶,最重要喺依個華DEE都幾靚仔。當我自我介紹完自己之後,啊妹突然爆出一句「哦,你就係睇波睇到失戀果位」,搞到我差啲將口入面啖手工啤噴落佢個頭度。我問佢點知件事,佢話已經有人將件事案件重演扔埋上網,而家好多人都會叫我做「李城失戀男」。喺依個MOMENT我淨係想消失喺佢地面前,因為失戀而出名我諗冇人覺得會係一件好事。

點都好啦,自從啊妹成為左華DEE睇波團(佢改㗎,唔關我事)嘅團員之後,我同佢就念黎愈熟,大家交換埋電話由英超李城又贏一場到今晚公司又要OT乜都講一餐,以前我覺得我EX已經好好,但識左啊妹之後我先知咩叫真正無所不談。之前EX莫講話越位唔會知係乜,佢仲以為碧咸去美國踢波果陣係踢美式足球,而家啊妹連防反同裝越位都知係乜,睇波果陣唔單止冇打喊路,仲會一齊扔花生殻(仲會自己執返依下無敵)。試過有幾次我地仲扔低其他人兩個落酒吧睇波,其他人以為啊妹係我女朋友果種眼紅紅嘅目光真係令我有飄飄然嘅感覺。當然令啊妹真係變成我女朋友果刻,就要講返熱刺果一場波。

因為熱刺對車仔場波直接影響李斯特城有冇冠軍,所以我同啊妹專登落吧撐依隊冇李城嘅比賽。當眼見熱刺領先緊兩粒,我仲以為要等到李城對愛華頓先有奪冠機會。不過卡希爾嘅入波令我再次見到提前完夢嘅機會,夏薩特追平果球我更加叫到對面街都聽到,我諗啲人直頭當左我係車仔FANS。當球證吹雞完場果一下我冇再大叫,我望住熱刺同車路士嘅衝突,腦海已經諗緊李城班球員有幾開心,我嘅眼淚自二月十四之後再次流落嚟,但今次係因為滿足、開心、仲有一種啊媽睇住個仔生性最後出人頭地果種安慰感。啊妹見到我咁冇出聲,佢只係默默咁攬住左我,然後用手輕輕咁拍我膊頭。我抬起頭,同佢只有0.03CM嘅距離,之後一個KISS,一個深情擁抱,令到喺依一晚搵到夢寐以求嘅嘢除左李斯特城,仲有我。

李斯特城主場對愛華頓果晚,李城球員捧起英超獎盃,而我隻手都拖住啊妹出現係華DEE睇波團團友面前。大家都好驚訝,唯獨係佢啊哥好似一早知道一切咁冇乜反應。曾經我要喺睇波同女朋友之間作出取捨,但我而家唔單止可以睇到愛隊成為冠軍,仲有一個可以真心同我分享喜悅嘅女朋友。人生完美至此,我真係已經冇嘢可以再挑剔。

作者:毛言地(本文章由聚言時報授權提供)


 因為李斯特城,我搵到真正嘅另一半(毛言地)

 https://www.facebook.com/GaldenPolymer/timeline