食煙唔會引致弱智（毛言地）

唔知點解依兩日梁天琦食煙依件事好似大事咁個個都講，我facebook成版都係梁天琦食煙。我明好多人對食煙冇好印象，我明食煙有好多負面影響，但你要記住梁天琦有六萬幾票嘅原因係因為依六萬幾人，想佢入去改變立法會風氣，唔想得成班泛民得個講字但咩都做唔到，唔係叫你揀男神叫你揀老公。我唔知想藉依個機會抹黑佢嘅係咩人，但我好肯定佢地水準真係好低。

一個人做唔做得野其實同食唔食煙真係冇任何關係。我諗全世界政壇有一半人唔係食煙就食雪茄，咁唔通因為咁就要叫佢地辭職咩？而且梁天琦已經冇喺拉票果陣啲人來人往嘅地方要市民食二手煙，以身為一個煙民黎講已經好好。講開又講，酒都一樣係傷身，一樣十八歲以下唔飲得架，咁點解梁振英成日喺公眾場合祝酒你班人又唔屌X佢？要講教壞細路，成日上電視嘅梁振英影響肯定大過梁天琦囉。

當佢理念係符合香港人要求嘅時候，我地要留意嘅係佢往後嘅行為有冇變質，有冇變到好似立法會班老屎忽咁離哂地，有冇堅持住佢當初依個理念，而唔係留意佢一日食幾多支煙又或者食咩牌子。香港人有一樣嘢好得意，無論係揀區議員又好立法會議員都好，佢地睇嘅唔係個候選人政綱係乜，亦唔係睇佢為香港為社區做左幾多野，而係睇下你平時有冇請佢地食蛇，新年有冇比揮春佢地。同樣道理，無論你幾為香港，喺打壓面前幾頂硬上都好，只要你一點起支煙，你就好似成為左一個罪人。無論你為香港做左啲乜都好，都唔能夠彌補你食一支煙嘅罪過。

麻煩你地記住，佢唔係你男朋友老公個仔，佢只係一個想為香港做啲事嘅後生仔，佢要面對嘅事比好多人更多，壓力更大。當你地話佢食煙唔好，但又繼續對香港種種不公而無動於衷，純粹妄想有一個超人人企出黎幫你搞掂一切的話，點解連佢食支煙減壓你都要嘈？撐梁天琦唔係因為佢食唔食煙，而係我喺佢身上搵到一種想改變香港嘅熱誠，一種香港而家最需要嘅態度。

食煙唔會引致弱智，只會引晒一班本身就係弱智嘅低能仔。

作者：毛言地（本文章由聚言時報授權提供）