泛民就好似一個分左手仲死纏爛打既前男友（柳臣）

咩男人最黑人憎？要數賤男之最，不得不提那種前天怒吼分手，昨天馬上死皮賴臉問你借錢，再過兩天到你家樓下求復合的男人。
這種男人無能之餘，亦不敢面對分手現實，整天就像一塊狗皮膏藥，死粘住不放。

泛民一眾政黨，正正就是政治界的賤格前男友。
多年來嫌棄激進派，本土派，抗爭者唔夠得體大方。總要高調宣佈「分開行」，猶恐怕沾上一點點不潔。
咁多年黎割席聲明數之不盡，不禁令大家都想問，同一張席到底可以割幾多次。
既然立場唔同，大家分手亦無可厚非，但佢每年選舉投票，竟敢叫你為佢含淚投票。

割左席要含自己含，所有選民都係支持同自己同一立場既政治人物，唔係比你攞黎當工具亂含既！
泛民為咗自己既議席，每每用各種論調企圖矇騙選民。

好似今次新東補選，佢地會同你講：
「呢個係民主派同建制派之爭，大家都支持民主，唔應該內鬥。一定要守住泛民議席。梁天琦機會低，都選唔到架啦！最後只會益左建制派。保送周浩鼎。而家６號梁天琦出黎鎅票，民建聯最高興。」

當一句說話打到水蛇春咁長，就好似好有道理咁，柳臣即管將句說話斬件分析。

「呢個係民主派同建制派之爭」
今時今日，呢個社會既政治光譜仲係咪咁窄呢？你唔係民主派就係建制派？將件事二元化對立可以令到選民唔需要思考，事實係香港唔係二元對立好耐啦！民主講求既係多元包容，選票唔係比你當選既工具，而係選民表達政治意見既渠道，政治人物先係工具。
今日投梁天琦，就係投你地口中既「暴徒」一票，咁泛民你話我聽，「暴徒派」係你歸你泛民定歸建制？
好明顯，泛民建制紛紛割席，表明自己同「暴徒」唔係同一路人。由此看來，香港政治光譜上，起碼是三足之勢。
如果社會真係好似泛民既邏輯咁二元對立，都應該係「暴徒派」與「非暴徒派」既對立，咁泛民應該去搵建制派大和解，一齊對抗「暴徒派」先岩。

「大家都支持民主，唔應該內鬥。」
呢句說話係典型既廢話，大家都支持民主，咁民建聯都支持民主架！人地叫民主建港協進聯盟喎？唔通你又話佢同你內鬥？你不如話佢鎅你票啊？
要知道泛民爭取既民主同建制派口中既民主唔同，亦同「暴徒」爭取既民主唔同。說得直白一點，「暴徒」的出現就是對泛民無能的討厭。就是為了踢走多年來無甚建樹的民主派。

「梁天琦都選唔到架啦！」
選民不是工具，不是棋子，也不是政治籌碼。說投票是神聖的，不是當選是神聖的，因為選舉是選民經過獨立思考投出的「民意代表」。
議席當然有佢既實用性，但一不見二十多年來泛民有發揮過它的用處，二是議席再重要，亦不及達義的重要。
投給梁天琦，是投給自己所認同的公義。這是投給楊岳橋所不能得到的。
投給楊岳橋同理，只要是選民自由意志下的選擇，都是值得尊重的。
當選機會高不是一個投票的理由，可不可以告訴我，到底係多人投佢，所以佢當選機會高，定係佢當選機會高所以我投佢？
前者，叫選舉；後者，叫買馬。

「鎅票啊！」
相反之下，鎅票論絕對是對民主選舉的侮辱。是不信任選民的表現。
不是某某出現了，鎅走本來「屬於」你的票。
而是貴黨不再受到選民信任支持，選民決定放棄你。
對於選票流失，泛民第一件事就是應該反省自己做錯了什麼令到「選民覺得你代表不了他，某某更能代表他」。
可是泛民從來沒有，泛民是一團不信任民主制度的混蛋，是一群把選民當成選票的混蛋。
只有混蛋會叫你含。淚投票。
一再強調：唔同立場點鎅你票啊？

「益左建制派。保送周浩鼎。民建聯最高興。」
泛民的心底話，沒有敵人，他們就什麼都不是。
他們不是追求民主的政團，他們只是反對民建聯政團。
為了敵人而存在的政治組織是空洞的，是常常搬龍門的。
到了今天，他們窮得只剩下「民建聯最高興」。
選民的高興呢？他們已經把最重要的一點丟到九霄雲外。
民建聯當選喎！共產黨高興喎！可唔可以唔好再恐嚇選民。沒有選民的支持，泛民什麼都不是。

「守住泛民議席。」
守住個位唔係問題，問題係守黎做咩？
2012年黃毓民拉布既時候，所有泛民視若無睹。
只有黃毓民，陳偉業，梁國雄三人苦苦支撐，計埋後期加入既鄭家富，都係得四個人。
近日黃毓民衝出主席台時，眾泛民同樣冷眼旁觀。
泛民既議席係多啊，又如何？

更令人氣憤的是，當時修改議事規則將大會主席的權力，擴展到其他委員會主席，使其剪布。
公民黨余若薇贊成收緊議事規則
公民黨陳淑莊贊成收緊議事規則
公民黨梁家傑贊成收緊議事規則
公民黨湯家驊贊成收緊議事規則
時至今天，公民黨仍欠選民一句道歉。
泛民有何面目要脅選民「守住泛民議席」？

作者：柳臣（本文章由聚言時報授權提供）