中國係全球最大既恐怖份子（柳臣）

而家香港光天化日被恐怖份子劫走左個人，成個香港政府都唔理！咩意思？
林鄭出到黎仲可以當咩事都冇係同你講新年快樂工作順利？
你仲交咩稅？你仲投咩票？呢個香港同戰亂既情況有咩分別？

講番件事比仲未知發生咩事既人知先。
「銅鑼灣書店」股東李波12月30日突然失蹤，被公安跨境綁架番大陸。而且發現李波既回鄉證仍然留左係屋企。李波曾透過中國電話號碼致電報平安，電話中講到「他們要我協助調查，如果我表現合作，就可以從輕」。
簡單講，姐係有個香港人，回鄉證係香港，被公安捉左番大陸。
香港人係香港境內被強國人綁架番大陸！！！

中國仿如全世界最大既恐怖份子，今時今日香港人既人身安全已經完全不受保護。任佢捉，香港政府都可以完全唔做野，亦唔敢做野！
點解會放公安入黎？又點解會比佢地出到境？呢件事香港政府知唔知情？而家個人到底去左邊？
到而家政府仲係扮曬野講官腔。
香港同中國仲有咩分別？

香港政府應該立即禁止中國人進出香港邊境。
一日未見番個人，港府都唔應該再放任何一個強國人落黎，更加唔好話放公安落黎！
但我都唔相信香港政府會做野，唔通佢會出面問中國攞人咩？
唔可能啦！香港政府689邊度會「干涉共產黨做野」？

但係香港人唔可以任由宰割。
依家雖然開始有媒體報導，但係仍然遠遠未夠。而且以香港人既尿性，沒幾日又會冇左件事。所以一定要keep住嘈！
我懇請每一個香港人都要炒大呢件事，用盡你地既平台同手段。唔可以比香港政府推卸責任。甚至要嘈到中國人都知道，嘈到外國人都知道。
唔單只係要中國比一個交代香港，而係一定要強國同香港政權將個人毫髮無傷咁交番出黎！
唔好因為覺得自己做唔到野，覺得無希望架啦。就唔再理呢件事，當無發生過。
當香港人連人命都可以輕視既時候，我地同當年小悅悅事件既中國人有咩唔同？

大家唔好再妄想咩一國兩制，如果今次佢得逞，以後公安就可以公然係香港犯法，佢鐘意就可以捉你番大陸。
今次書局出書就已經被人捉，你有冇係facebook罵過中國？罵過政府？罵過共產黨？
隨時下一個捉既就係你，你身邊既人，任何一個人。

作者：柳臣（本文章由聚言時報授權提供）