只值$22.5的香港人文：（毛言地）

網絡廿三條二讀因為立法會內法定人數不足而流會，我本來以為會係今日最爆嘅新聞。話哂香港人好著緊自由，大家都話反對網絡廿三條，而家二讀未過到，應該會有人慶祝下階段式勝利。

點知琴日大家嘅注意力，仍然係買一送一嘅GODVIA雪糕上面，不斷有人鬧佢排咁耐得個桔，不斷有人哂命排左幾多個鐘終於食到依支計埋平左成廿二個半嘅名牌雪糕。原來香港人仍然冇變過，仍然只係會著重於眼前嘅利益，自由同埋平廿二個半，香港人選擇嘅係後者。
　　
GODVIA嘅雪糕我食過，係幾好味，但我真係搵唔到一個理由比自己用兩三個鐘去排一支半價雪糕。香港人唔係話唔夠時間用咩？唔係已經好討厭等依回事咩？咁點解一支雪糕就足以令你地放左工趕餐死咁去排隊？如果你話你差廿二個半就儲夠錢買樓而GODVIA做緊嘅推廣，就係你食一支雪糕就送廿二個半比你嘅我唔阻止你，但而家只係價錢平啲，香港人已經可以痴哂線咁排到天荒地老。大佬啊，前世未食過雪糕？排唔到嘅仲要出黎發爛渣話人地唔肯比你食平雪糕依下真係同大陸人一啲分別都冇。香港人唔係爭取緊最低工資，最高工時，力撐自己要嘅係生活唔係生存咩？如果我係商家，見到你班港豬為左小小打都肯排生排死，我都搵唔到一個理由要自己賺小啲去益你班打工仔啦下話？反正香港人賤到咁，唔加你人工你咪又係內心屌哂鬼但繼續默默做？
　　
香港人成日以為自己好精明，一定要拎足晒d著數。你覺得廿二個半一支雪糕商家會冇得賺咩？你覺得人地真係送左廿二個半比你洗？唔好傻啦，就算只係做廣告、搞噱頭，人地都係等你埋黎送錢比佢洗，只係冇將你啲血吸得咁盡。排咁耐隊就係為左送錢比人洗，其實係香港要搵錢真係唔難，用下掩眼法，等班人以為自己有著數，錢就會不斷入黎。
　　
香港人乜都鍾意爭取，但有時候又真係幫唔落手。廿二個半就已經令人班人願意呆企兩個鐘，只係為左一杯食完唔會升仙嘅雪糕，但到爭取阻止網絡廿三條立法呢？我想問下又有幾多個排雪糕嘅會肯企出黎？你係冇雪糕食啊，但你唔洗比果四十五蚊出黎，仲可能可以保護到香港最後一個創作嘅自由天地，你可以繼續睇達哥、聽改歌、聽翻唱、上高登創意台。無奈仲有好多香港人視依一切係理所當然，以為乜都係免費，所以要錢嘅GODVIA雪糕自然好似更吸引。我唔明到左而家點解仲有咁多人唔明大禍臨頭，仲係FB呻緊排完冇得食雪糕好嬲。如果香港人目光仲係咁短淺，乜都講利益為先，咁香港就真係冇得救。
　　
原來一直以為自己好珍貴嘅香港人，就只係值一杯廿二個半既雪糕。

作者：毛言地（本文章由聚言時報授權提供）