唔好比流會自亂陣腳（小西毒）

由上個月尾宣佈恢復二讀時候開始，大家一直磨刀擦槍，不斷宣傳，希望更多人關注事件，就係等今晚盡地一煲，如箭在弦，不可不發。只不過今日立法會意外流會，搞到大家好似要梗硬將準備出嘅大絕、磨好既利刀，硬生生咁收返，即使再次掀起一番討論：究竟係建制玩手段定依然笨實？曾鈺成做乜塊面黑過包公？大家應否繼續集會示威？比人感覺有少少自亂陣腳。

老實講，流會對群衆黎講意義真係唔係好大，頂多係叫做比多左時間我地做野，效果同拉布其實差唔多。就連689都知，無論拖幾耐，網絡23條始終都會過。如果大家乜都唔做，又或者只係寄望某幾位議員拉布嘅話，分別都只係早死同遲死。如其晒時間估點解會流會，做乜唔花多D時間拆彈呢？

再者，大家既然都對某啲政黨失望，何必寄望佢地係議會裏面有啲咩作爲（例如：促成流會）呢？無論班議員做乜都好，某程度其實對個結果幫助不大，再加上班人咁潔身自愛，即使下個禮拜復會都唔會有咩變化，反而保皇黨仲會提高警覺添。呢場硬仗唔係淨係可以靠議會抗爭就得，要動員更多的群衆力量，若下個禮拜輿論仍然停留係拉布定積極討論，都只會係死硬。

雖然流會所產生嘅花生可能真係幾好食，不過既然敵人比多左我地時間，點解唔好好運用呢？各位民間團體，依家既然多左時間，與其只係聯署要求議員提修正案、拉布同投反對票，不妨可以再叫高啲價，必要時甚至做番上年十一冇做嘅野，畢竟民間力量並冇直接左右投票嘅能力。另外，我地同時要小心建制同689果邊係依個禮拜又做咩手腳，畢竟佢地動員能力比我地強（雖然手法並不光彩，但成之有效），而最近依幾日政府亦都出黎解畫，相信會有啲唔太上網或者唔知咩叫直播打機嘅姨姨信以爲真。

無錯，話唔定保皇黨真係見到咁所以希望我地一鼓作氣，再而衰，三而竭，無錯，我都知勃起唔射會好辛苦，不過即使佢地故意咁做又點？大家反惡法，莫非就只係等依個moment大射特射？咁樣只不過同一個等發洩嘅精蟲冇分別。換個角度諗，呢度火仍然未夠紅，煽風點火就係咁解。

學啲大粒佬講，要對準政權，唔好比D花生模糊焦點。

作者：小西毒（本文章由聚言時報授權提供）