殺死童年的家長（毛言地）

我記得喺我細個果陣，學鋼琴畫畫依啲係叫做興趣班。因為鍾意所以去學，叫興趣班好正常，但到在而家我再搵唔到有幾多個小朋友去興趣班真係為左興趣，大部份都只係比老豆老母迫佢去學，為嘅只係有一張證書，方便日後搵學校。你問我童年回憶係乜，我會答你係比卡超、亞古獸、江湖、仲有巨商，但而家班細路唔好話回憶，可能瞓嘅時間仲少過我。班家長口口聲聲話做嘅一切都係為左小朋友，但其實扼殺左班小朋友未來嘅正正就係佢地自己。

玩係人都鍾意，特別係小朋友。幾個細路圍埋一齊就可以嘻嘻哈哈乜都玩一餐，你扮超人我做忍者個個係度出必殺技仲配埋音，你覺得低能，但佢地樂在其中，但到左而家仲有幾多個可以咁玩？一個星期七日，鋼琴小提琴畫畫溜冰學英文就用左五日，你以為之後果兩日可以好似大人咁放假咩？唔好意思，仲有補習。大人依邊爭取緊最高工時，個個都想五天工作，但偏偏對住自己仔女就做左無良上司，返完學仲要開「OT」學一堆自己冇興趣嘅野，加埋補習溫書做功課，一日做十八個鐘冇停手。玩？你唔好玩我就真啦大佬！電視都未必有幾會睇啊陰公，做完十八個鐘野你仲唔瞓埋淨返果六個鐘咩。啲老豆老母成日話返工好辛苦，而家學多啲野為你好，等你大個就可以打份好工舒服啲。個細路實唔明，有咩仲可以辛苦得過而家自己咁樣？讀完書出黎社會仲要捱，為左自己好所以而家讀去play group呢樣個樣就捱定先？依個道理細路唔明，我都唔明，我更加唔明班家長點解會明啦下。

如果一個人乜都同你講錢，你會覺得佢好市儈，但班家長做嘅所有野其實就係教緊個細路「世界只有錢先重要」。日日話大個搵份好工賺多啲錢，日日話報名學野好貴你要比心機學，班細路有咩可能唔比老豆老母教壞？搞到佢地以為有錢就可以，但你可唔可以比五百蚊要阿強同你做朋友？你可唔可以比一千蚊叫小麗做你女朋友？你比幾多錢又可以買番細個坐定定睇多啦A夢笑大雄白痴嘅時間？個小朋友成個童年都冇歡樂，記得嘅只有喊哂口咁同老母講唔想再學琴仲要比老豆打、記得嘅只有一諗起起身返完學又要學英文驚到賴尿、記得嘅只有每晚瞓落床最希望嘅就係個天永遠唔會光。我地依一代會講最開心嘅係童年，可以冇包袱咁玩；過多廿年後既一代人，如果有人講起童年，大家傾嘅就只會有以前自己幾咁絕望同埋無助。

身為老豆老母嘅大人都知OT有幾慘，日日做自己唔想做嘅野冇得放鬆冇得休息，唔好話夢想，就連自己興趣都冇時間去做。你地切身咁體驗到依種痛苦，但點解轉個頭又要你果個得幾歲嘅仔女去承受你承受緊嘅痛苦？報興趣班你有冇諗過佢想唔想學？點解佢連想睇一套卡通片嘅自由都冇？好多大人話自己細過都好辛苦，想學野都冇得學，但依個係咪就係一個理由比你去咁折磨你個小朋友？好多大人會講細個雖然窮，但窮得快樂，而我相信生活係香港嘅小朋友可能好多都生活無憂，但快樂兩個字對佢地黎講反而遙不可及。

作者：毛言地（本文章由聚言時報授權提供）