如果覺得想要改變，除咗投票，或者可以再行多一步（免責聲明）

好多人會將立會嘅議題，或者應該係立會度打嘅議題帶落區議會度打。向選民表示，呢啲議題同地區利益息息相關。但區議會本身打嘅係地區民生基建，呢啲嘢雖然同一啲大議題相關，但其實亦都會有衝突位。有啲人會將選民對大議題嘅冷感同反對歸納做佢哋港豬、政治冷感等等。

但矛盾同難做嘅地方，係你對佢哋嘅反應唔鐘意同抗拒都好，你嘅議席係需要區民支持同接納。呢個唔係一種，「嗰樣嘢好重要、好偉大。所以我哋要付出甚至無償付出。你唔付出，你唔撐，你港豬。」嘅情況。現實，亦無可能依靠一種咁嘅tone就得到人支持。

而係確實需要深耕細作，搶議席，唔俾建制插到旗。令到佢哋係立法會選舉嘅優勢逐啲逐啲減少。就咁聽落好似杯水車薪，希望好渺茫咁。但羅馬城唔係一日就建成，千里之行始於足下，有樣嘢叫集腋成裘。定係大家想建制保皇派可以繼續利用區議會繼續穩定樁腳，增加佢哋選立會嘅優勢？
　　

中出羊子表示：「地區工作，樣樣嘢都係錢，亦要唔少時間。唔係咁多組織有嘅資源支持得到。選民要求候選人，未當選就兌換到承諾，其實對佢哋候選人嚟講係好困難，其至係無理。」
林忌又有建議話：「發起一個crowd-funding嘅project﹐去支持游惠楨BB去追擊老鼠芬。」我就覺得，林忌呢個諗法可以擴大到全港十八區。
如果大家真係咁支持噚晚落選嘅朋友或者係佢嘅組織嘅話，就不如一齊籌旗，等佢哋可以逐個區逐個區咁慢慢打返嚟。
　我知道，一講到要啲實際啲嘅付出、成本嗰陣，未必個個都肯付出或者有能力參與到。所以呢個idea真係有人帶頭實現嘅話，我希望大家都按能力出啲。少少無拘，多多益善。唔好自掃門前雪，以自己嗰區有冇問題嚟作為捐唔捐、捐多少嘅準則。


當然我知道呢個諗頭，聽就好聽，實際上都忽略唔少因素。身邊幾位朋友前輩都認為：「要我拎筆錢出嚟支持個人，係呢四年做地區工作，究竟籌到幾多錢先可以叫有幫助？又呢四年過後，亦都唔知選唔選到架喎。個RISK其實好大。」而Marketing第一課，選擇嘅過程往往都係Emotional Driven。好多人投某個候選人，決定性因素往往係啲情感聯繫，「我同佢熟」諸如此類。而唔係一啲理性嘅因素。

但我最後都係覺得講出嚟好啲。做同唔做就交返俾嗰區嘅區民，咁會相對少啲拗撬，始終Crowd-funding本身係啲由下而上自發做嘅嘢嚟，冇得監粗。好似黃埔東嘅惠楨BB、TKO厚德嘅曾浩文、筲箕灣嘅梁詠詩，呢啲都係比較大機會有能力入到議會嘅人，值得區民以實際行動去支持佢哋。佢哋全部都輸得唔多，亦都有相對多嘅居民希望佢哋當選，如果大家希望佢哋當選，就做啲嘢令佢哋真係當選啦！（其實仲有今屆樂民龐一鳴、八鄉南朱凱迪都好值得大家去支持架！）
（唔好係度Ｘ我撐鴿鴿，我撐邊個關你Ｘ事。我係熱狗係左膠係鬼。）

大家都話今日香港搞成咁係「共孽」，既然如此，呢個孽障就等我哋一班香港人一齊去努力去嘗試，去破除佢。

作者：免責聲明（本文章由聚言時報授權提供）