兄弟齊心魔咒（陳假）

今次係想讚下誠哥(李嘉誠)嘅高明。

唔知最近大家有無留意鏞記大少遺孀上訴成功，鏞記要清盤呢？

鏞記創辦人甘穗煇先生出身寒微，經過苦心鑽研燒臘，創出獨門秘方，經一番苦心經營由一檔大排檔做到係中環擁有一幢大廈，曾經一度成為世界知名食府，鏞記品牌可謂一代香港傳奇。不過係甘老先生過身之後，鏞記食物質素能否保持成疑，最後鏞記品牌更可能因為兄弟攬炒告終。

事件之中，邊個啱邊個錯，做外人嘅我係好難插咀，不過我想講嘅係依單野同點樣分配家產同權力有好大關係。

//甘父一直的意願是兄弟合力打理鏞記，有平等話事權，股東之間互相公平對待//

係咪將個餅切開對等就可以相安無事呢？

依個例子就話俾大家知唔係，兩隻地位差唔多嘅老虎放埋係同一個地方，主次難分，又無人head住佢地嘅話，最終都係好易會因為爭話事權打交收場，依個亦係好多華人企業嘅命運。

咁點解我一開始會話讚誠哥呢，可能好多野大家都唔滿意誠哥，不過誠哥有好多處事手法又真係值得學。係分家產嘅手法上面，誠哥就無將兩兄弟放係同一間公司，而係分開兩兄弟係一人做一瓣野，各不相干，就算誠哥去咗，兄弟爭權嘅機會亦會細好多。

誠哥就係可以破除兄弟齊心，其利斷金依個華人成日講嘅傳統，因爲好多時依個傳統就變成內爭魔咒，一廂情願要兄弟齊心，倒不如適度分裂仲好。係依點上面誠哥好似比其他華人富商走得更前，不過就始終仲未走出華人企業家天下嘅傳統。

依方面我會buy鬼佬嗰套：擁有權同管理權分開，自己家族係老細，掌舵人可以係外面請返嚟。

話說回來，各位有錢嘅朋友係分家產嘅時候不妨考慮下誠哥依個方法。相反，如果你想人地家無寧日嘅，又不妨幫下人一山藏二虎。

作者：陳假（本文章由聚言時報授權提供）