「旗幟高舉，暴力踢法」大紅花朵高高掛：布力般流浪（曉高臣）

前英超冠軍，真正既「Big 5」，利物浦同熱刺都做唔到既野，布力般做到。當年既「舒利亞+瑟頓」組合第一季合作已經合力攻入49球，當時既領隊就係「永恆恨曼聯」既前利物浦巨星杜格利殊，佢地呢班人夾手夾腳協助布力般流浪力壓曼聯奪得94-95賽季英超冠軍。

好多劇本都係風光之後，就開始遇上多事之秋。由於高層管理不善，佢地開始將球隊好手紛紛出手（擺明之前喪買人爭落既債務要找數）。賣走d球星，聯賽成績自然回落不少，卒之呢隊英超冠軍於98-99賽季降落英冠聯賽。但兩個賽季後又重新殺返上英超。

05-06賽季，恰逢布力般流浪拎英超既十週年紀念。而我就係呢個賽季注意到呢隊踢法毫不錫身既布力般流浪。

冇乜邊d超級巨星，但好幾個球員我都印象深刻。第一個就係比拿美。細細粒既身材，通常配搭既就係屈速既特色，冇錯，比拿美個年就真係出彩，13次攻破對 方大門，慶祝動作例牌攤開雙手露出紋身然後一路行一路鳩叫，我個期好鍾意幫人改花名，我就叫佢老鼠仔。突然爆seed，突然入楔，突然起腳，總之非常突 然，極具特色。

而比拿美身後就有兩個「碧咸」。先講「挪威碧咸」摩頓柏達臣，好眉好貌青靚白淨一定係更受球迷愛戴，而摩頓柏達臣多次show off佢既罰球直入絕技，射罰球唔使用力既，四兩撥千斤，舒舒服服就將球波撥入死角。

仲有件阿仙奴青訓賓特利，阿記當時陣容鼎盛，後生仔被借走就好正常，賓特利把握到一個好好既上位機會，黎到布力般當堂生猛曬，最後該季結束之後，索性加盟 布力般。賓特利盤扭出色，左右開弓，能得分擅助攻，俾人話佢係「新碧咸」。（可見傳媒幾撚使吹，拎個前鋒去同中場比較）

要點先可以被稱為暴力般流浪？咁就要請教下沙維治同尼爾兩位大師兄啦。沙維治呢d擺明車馬做爛仔，落腳狠，手多腳多，最鍾意纏擾對方球員，佢個種纏擾直情 令對手心生厭惡，因為條友根本係終極煩膠黎。佢既目的無非就係令對方無法全情投入進攻咋嘛。尼爾呢就係專注於兇狠既球員，成件大舊衰咁棟係後場，你見到佢 都畏懼怕三分。而暴力般既門將就係美國佬費度。穩穩陣陣，唔會發波瘟。

而2008年之後，我已經好少關注布力般流浪，得返個摩頓柏達臣望得落眼，同偶爾仲見到費爾既神撲。

家陣布力般流浪已經落左去英冠四年，唯一仲叫對英超留有貢獻，就係當年送左菲爾鐘斯去左曼聯，菲爾鐘斯完全繼承左布力般千禧年後既暴力般元素，每次見到菲爾鐘斯，我就會記起，以前原來自己都留意過有隊波，叫布力般流浪。

作者：曉高臣（本文章由聚言時報授權提供）