FB core value – 無友不如己（犁牛）

係呢個「你唔識我、我唔識你」嘅臉書世界上面，如果有人試著去了解你，其實算係一種「恩賜」。

試想像係呢個資訊爆炸嘅年代，有人願意花時間去「see more」，然後like一下或者留一個言，大概都花左一兩分鐘時間。

「like」有時係贊同，又可以係「已閱」，算係留低一個印記。所以通常我都會對留言者嘅留言回一個「like」，除非佢嘅言論我極度唔認同，甚至連屌鳩我我都會「like」。唔「like」嘅通常係個原因：「極度唔認同」、「呢個人好討厭」、「完全唔明」、「睇唔到」。

有時見到留言得多，我會對呢個人有印象，之後我開始會去睇下佢嘅wall，睇下有無有趣嘅分享、獨到嘅睇法、生活瑣事或者靚人靚相之類，有趣嘅、有啟發性嘅我一定會like，有興趣嘅話題我一定會留言。

相反，有d好悶嘅或者佢d野我好討厭嘅，我會unfollow。留言無反應、大量like無回頭好似石沉大海一樣嘅，除左unfollow之外我其實考慮緊unfriend或者block，因為明顯彼此當初只係因為好奇而add一下，但事實係大家睇法、興趣等等都無一個共通點，咁無論大家嘅政治立場幾一致都好，都唔會有fun嘅成份係入面，倒不如早早緣盡好過，反正我唔係為政治而活，我只係想痛苦嘅塵世入面搵一d快樂而已。

作者：犁牛（本文章由聚言時報授權提供）