928 – 衝擊前夕文：（larrylo）

去年今日，搭巴士，睇住個Road-Show，唔係聽到高官話人大決定不能撼動就係強調依法治國。掃電話，又看見相似嘅新聞或集會。眾人嘅氣氛都比以往緊張，好似將會發生一場大事。

數日後，學聯學民宣布罷課，龍和道附近嘅公民廣場開始人多。我跟一眾討論區友人，都多次到場，討論時事，更佯裝大學記者，訪問在座學生。「未打算Quit U 啊，不過如果成績太差，咪讀多個 sem 囉」「我擔心學業架，希望可以快啲完」佢哋眼神有火，但未夠憤怒。最少，到場坐下嘅學生，都係集中聽台上嘅演講，三子嘅戲碼。當我聚精凝神之際‥‥‥

「Excuse Me ? 」

一位日本記者上前問我接受訪問，想知道我對日後罷課行動有何期望。我思忖半刻，開口作答，講出：「香港人終要認真打一次，因為人大嘅決定係破壞法治，加速中共殖民。即使成功推翻 831決定，廢除功能組別，問題仍未解決。一國兩制係一個大話，唔好信。香港人，一定要獨立建國！」我愈說激動，吼聲劃破大台嘅沉默。眾身邊朋友都掏嘴大笑，好不尷尬。之後我獨自一人，周圍行下，冇嘢好做，返屋企。

925，學聯要話要追擊梁振英，迫佢交代，就直上禮賓府，夜晚九點半誓師，十點半出發。雖然我唔係社運常客，但深知遲到係社運界自古以來嘅傳統，所以我等屋企人半訓晒，就自己帶齊急救包跟萬用刀上陣，期望一場腥風血雨。那時，十一點。

點知，到咗金鐘，到咗天橋，群眾先慢慢行出來，氣氛跟七一無異。我照跟朋友會合，朋友仲話我無謂帶多把刀俾人砌「藏有攻擊性武器」。我深感愣然，只好邊行跟大隊走邊留意垃圾桶，掟走把萬用刀。

走到上亞厘畢道，突然感到一絲不安。環顧四周，原來群眾間有數位便衣游走附近，高處有不少警察和天眼監視我哋。上斜到咗一半，差人停低，勸阻學聯上前。眾人鼓噪，大叫開路。我在喺中間後排，只係同朋友一齊怒屌差人和學聯無能，心想衝突成事但不敢上前騎劫，令我陷入苦惱嘅旋渦。

「轉右上斜睇吓！」

我跟友人於是轉右跟上，跑上高處。原來，有數輛豬籠車泊喺門前，唔使諗。返到去主要斜路，鼓躁稍減，群眾繼續上前。我跟朋友討論應否跟進，最後都係撤退為上，返到一個小公園繼續小組討論。

正當討論行動細節之際，突然有人大叫學聯放紙飛機，最後散水。眾人一起說聲屌！

就由呢個時間開始，我放棄日後嘅抗爭參戰，直到佔領金鐘、旺角、銅鑼灣後，至慢慢行出來，開始喺開放大台討論時事，叫人直接行動‥‥‥

作者：larrylo（本文章由聚言時報授權提供）