做個真正魚拉突：齊來學唱曼聯「口水歌」！（小西毒）

作為一隻忠實嘅獌，相信大家都對「Glory Glory Man United」唔會陌生，呢首每次曼聯係奧脫福比賽完畢都會播嘅「會歌」，筆者幾乎一聽到前奏就識跟住唱咁濟。

睇直播嘅時候，唔知大家有無留意，比賽期間啲曼聯fans會係度唱歌幫球隊打氣，啲旋律就好熟悉，但卻唔知佢地唱緊啲乜。其實佢地唱嘅係一啲based on英國傳統歌謠嘅改歌/口水歌（chants），全部都係球迷自己作，無歌名，只有歌詞。今日就讓筆者介紹幾首出名嘅比大家認識。

先講小弟最鍾意果首，係同曼聯傳奇——傑斯有關：

Ryan Giggs, Ryan Giggs,
Running down the wings.
Ryan Giggs, Ryan Giggs,
Running down the wings.
Feared by the Blues, Loveed by the Reds,
Ryan Giggs, Ryan Giggs, Ryan Giggs. （重複）

首歌嘅內容講到傑斯係邊路有幾快，令同市宿敵曼城（Blues）感到恐懼，同時深得曼聯球迷愛戴。由於傑斯已經退咗休，所以呢首歌已經好少唱，但係因為傑斯仲係曼聯做助教，所以好間唔中仍然會聽到呢首歌，而小弟對上一次係現場直播聽到呢首歌，無記錯係上季季尾。其實其他名宿或者名將，例如蘇斯克查、高爾、維迪都有屬於佢地嘅經典歌，有時間再同大家開心share。

至於現役球員，雖然依幾季新加盟嘅球員比較多，但係部份球員，例如小豬同羅美路，已經有屬於自己嘅chants，不過比較出名嘅chants唔多。其實只要加盟一段時間，曼聯嘅球員都會有屬於自己嘅歌，就好似上季打得非常差嘅法卡奧，都有佢嘅chants（雖然只係得一兩句）。而一啲老臣子，關於佢地嘅歌就比較出名，讀者或者會問：「咁依啲歌幾時會唱嫁？」其實唔定，好睇現場球迷反應，通常係個球員係果唱波表現好，又甚至乎當佢觸球就會唱。就好似今季史摩寧狀態大勇，小弟幾乎每場都聽到「Smalling, Smalling, Smalling」，聽到不知幾興奮，下次如果大家聽到嘅話，都可以跟住唱架！

史摩寧
Smalling, Smalling, Smalling,
It’s Smalling at M-U-F-C
He’s big and he’s black,
And he plays at the back,
It’s Smalling at M-U-F-C （重複）
（註：坊間另有版本是Chris Smalling from M-U-F-C）

依首歌講到史摩寧一夫當關嘅表現，各位魚拉突你同唔同意呀？

朗尼
I saw my mate the other day,
He said to me, he’s seen the white Pele,
So I asked, who is he,
He goes by the name of Wayne Rooney
Wayne Rooney, Wayne Rooney… （重複）

依首歌其實已經好耐，始終朗尼都已經效力紅魔超過十季，歌詞講到球迷比喻朗尼為「白比利」，個人就有啲保留喇，不過……作爲曼聯fans唔可以唔識依首代表我地紅魔隊長嘅歌。

卡域克
Oh, oh, oh,
It’s Carrick you know,
It’s hard to believe it’s not Scholes（重複）

將卡域克比喻成曼聯名宿史高斯，雖然佢地踢法始終有分別，但係以卡域克近呢幾季嘅表現，的確令人想起當年嘅史高斯！

除左有關球員嘅歌之外，曼聯球迷係特定嘅場合都會唱其他主題嘅歌，例如入決賽、對曼城、利物浦等等。以下有兩首筆者特別印象深刻：

曼城
The City is yours,
The City is yours,
20000 empty seats,
Are you fucking sure?

其中一首反鏝歌，以取笑鏝冇曼聯咁多fans，咁受歡迎。至於點解係20000 empty seats，小弟則不太理解，望高人指點迷津。

慶祝
Que Sera Sera,
Whatever will be, will be,
（自由發揮）,
Que Sera Sera.

這首調為大家耳熟能詳——「隨遇而安」嘅改歌，有好多個版本，例如入足總杯決賽，就會唱：「We’re going to Wembley」；當年入歐聯決賽就唱：「We’re going to Italy」。而上季則唱了：「In Van Gaal We Trust」。歌詞百搭、易唱、易上口，只不過唔知今季有冇得唱呢？

其實除咗會歌， 口水歌亦都係外國足球文化之一，不但能夠激勵愛隊，同時亦能增加比賽嘅娛樂性。其實除咗曼聯之外，其他球隊亦有佢地自己嘅口水歌，比較經典嘅有阿仙奴嘅「It’s happened again」，大家有時睇波嘅時候，如果覺得評述講得好悶，不妨留意下依啲花邊野。

後記：講咗咁多，筆者忽然醒起港隊噓「國」歌風波，有啲人為咗唔好「得罪共產黨」，而建議唱改版「國」歌。計小弟話，「國」歌可以照噓，比賽期間大家一齊嗌「We are Hong Kong」之餘，不妨唱一啲屬於港隊嘅改歌，唔洗好長，只要簡單、大家耳熟能詳、琅琅上口就得。一來發揮香港人嘅創意，二來建立屬於香港本土嘅足球文化，三來比港隊球員感受到球迷對佢地嘅支持，一舉三得，你話幾好！

作者：小西毒（本文章由聚言時報授權提供）