一句英文,終生受用,無論係邊隊球迷都啱使。

香港既球迷,無非係網絡世界既犧牲品。好多球迷一開始都係勝利球迷,邊隊勁咪捧邊隊,傳媒既報導亦成為推波助瀾既好幫手,好多人都鍾意隊波之前應該都深受薰陶。梗係啦!愛隊球場唔係身邊,愛隊球員唔係身邊,邊個唔係靠電視同電腦接觸愛隊呀?而若干年後,部分勝利球迷會轉變成忠實球迷,而部分勝利球迷會繼續做勝利球迷。

香港社會又的確好多奇人奇事,紙媒講波一定會印曬馬會賠率,關於足球既文字少之又少,總之歌手唔講歌,演員唔講戲,講波實會連埋賭博,睇電視新聞講波既片段唔會超過十分鐘。直到網絡既興起,好多球迷就上網搵養分,Facebook同論壇成為球迷最主要獲取足球新聞既渠道。言論自由係好,可以暢所欲言,無奈既係深度唔夠,久而久之,同一則新聞四周圍都會見到,同一種論調四周圍都會見到,當有人提出異議,群而圍之,罵戰四起,沒完沒了,好似贏左場罵戰就代表自己講既係道理,

勝利球迷係世間上最脆弱既生物,佢地經唔起打擊,愛隊輸波佢地會屌曬老母,球隊失落冠軍佢地會屌埋領隊,熱衷罵戰,又唔好好溫書補充知識,英文又唔識多幾句,唔識上英文網站睇下外面世界幾燦爛,每日仲係成條井底之蛙咁上網。

勝利球迷無非都係膚淺,人云亦云同沉迷既圍威喂。難怪既,係呢個不求深度,只求三分鐘熱度既社會,好多人睇既足球新聞都係睇最Hit果類,即係每日就睇邊隊贏波邊個入波諸如此類最柴米油鹽既資訊,而球隊歷史,球員趣聞,球隊與球隊之間既恩怨等等,好多人對此愛理不理,而愛隊更加似佢地拎黎曬命既籌碼,如果愛隊輸波,就會覺得好冇face,因為會俾其他同伴笑。所以勝利球迷每逢愛隊遇到低潮,佢地就會專家上身數臭球隊大大小小既野,而當愛隊重回勝軌既時候,佢地就會即刻揉合變臉既國粹,開始吹奏返愛隊點勁點叻。

愛之深責之切,唔適合用於勝利球迷身上,皆因勝利球迷,只不過當球隊係炫耀既玩具,佢地唔會去諒解球隊發生乜事,總之遇到低潮就唔得,一定要贏波先叫足球。

正如我之前所講,好多球迷一開始都係勝利球迷,但之後有人會轉變成忠實球迷,即係真球迷。識得轉變,點解?呢d係年齡帶來的影響,睇得波多,慢慢感受到勝利同冠軍唔係唯一,球隊既未來先最重要。試問有邊隊波冇經歷過浮沉呢?當地球迷可以做到不離不棄,遠在香港既球迷卻只懂得對球隊諸多怨言,其實呢D根本就係幼稚既思維,球迷要成長,就必須放低對球隊成績既然執著,用個心去支持,遠比得把口講重要。

做球迷除左要對球隊有感情,仲要識update自己,多D思考問題,唔好打開部手機上網永遠執人地口水尾,人地鬧你又走去跟風,其實浪費緊自己青春咋嘛,永遠只懂得睇部分賊媒同賊文,害了自己卻不自知罷了。賊媒同賊文都唔識分,更加可憐。

 

作者:曉高臣(本文章由聚言時報授權提供)


 「If you don’t support us when we lose or draw, don’t support us when we win.」(曉高臣)

 https://www.facebook.com/GaldenPolymer/timeline