教堂也上香（明德偉杰風）

我曾經到過柬埔寨嘅窮鄉僻壤，探訪一間由僧侶營運嘅孤兒院。孤兒院隔離係一座比吳哥窟更老嘅佛寺，灰色嘅石材同吳哥窟一樣，但日久失修，外面望落去有種廢墟嘅感覺。內殿同佛寺嘅表面好唔同，紅色嘅柱托住天花嘅壁畫，繪上白色嘅象，金色嘅車，藍色嘅天。屋頂下所有嘢都係有顏色嘅，天花牆壁石柱都係新油嘅，只有受千年香火供奉嘅佛像係灰黑色。殿內有個著白衫黑褲嘅老人，坐係地下挨住碌紅柱，睇得出佢坐咗好耐因為佢挨住嘅位置只剩低石柱本來嘅顏色。離開嘅路上有一間中式建築嘅廟宇，裏面坐咗幾個白衫黑褲老人，供奉嘅唔係關帝唔係觀音，而係鄭和。

鄭和廟係中華文化邏輯上似乎好合理，受尊重嘅歷史人物都有機會係神枱佔一席位，拜關公因為佢講義氣，拜魯班因為佢係技術高明嘅工匠，而拜鄭和可能係因為佢嘅航海技術同埋帶畀東南亞地區中國嘅科技。而照呢個邏輯，百幾年後搞上市要拜李嘉誠，搞電視要拜邵逸夫，唱歌就睇怕要拜E神。不過稍為有睇過吓中史書講鄭和下西洋就應該知道鄭和係個回教徒，係個穆斯林。我見到間廟嘅時候就覺得幾矛盾，一間道教嘅廟宇供奉住一個穆斯林，另一方面又親眼見證中史書上講鄭和對東南亞嘅影響。其實諗深一層都唔係咁出奇，哮天犬何嘗唔係一隻狗，孫悟空何嘗唔係個虛構人物，耶穌何嘗唔係個猶太人。

華人，乃至東亞社會都有種咩都信，有咩都唔信嘅文化。好似係西遊記玉皇大帝可以同佛祖玩埋，係日本喜事就去神社，白事就搵和尚。信仰上嘅矛盾唔係中國先有，基本上所有宗教都有一定嘅矛盾，而大部份嘅矛盾源於外來宗教同本土習俗嘅融合。

Syncretism，指嘅就係呢種現象。天主教，源自以色列嘅一神教，但係教堂堆滿偶像嘅雕塑同畫像，融合羅馬嘅多神宗教，有一堆聖人，其實就係各地嘅守護神。人文主義結合基督教做就無數咁多嘅雕塑同畫像。伊斯蘭教要女人包頭，唔係可蘭經嘅規定而係古時上流社會嘅習俗。係中國，三聖廟供奉孔子，佛祖，同埋老子。挪亞方舟嘅故事，大概係參考自 Epic of Gilgamesh (編按:蘇美爾神話)入面嘅方舟故事。越南嘅高台教，除咗拜儒釋道之外仲拜埋耶穌同穆罕默德。

有個朋友話佢返開教會，我問佢咩教，佢話 Christian， 我話 Christian 有好多種，有天主教，東正教，聖公會，耶穌後世聖徒，仲有新教嘅唔同派系，你係邊種？佢話，Er…… Christian 囉…

如果你信教，好大機會你對自己宗教嘅歷史一無所知，我見過太多呢一類人。我唔係要否定任何一種宗教，但係明白點解要做一樣嘢而做，比覺得要做所以做，係高一個層次，有助精神上嘅解脫。與其讀聖經故事，不如睇下基督教歷史，又睇下其他宗教嘅歷史，了解下點解個牧師唔會同你講呢啲嘢，又諗下點解你要聽佢噏呢啲嘢仲…..

其實教堂上香，又有乜好怕喎~

作者：明德偉杰風（本文章由聚言時報授權提供）