【食譜】心機菜！梅菜扣肉

話說呢味嘢唔晌我個wish list中，只係第三晚同呀姨一家晚飯時大家講開想我煮乜。

我個表妹話姨丈同表妹夫鍾意梅菜扣肉，而大少爺又咀角含春咁笑，我就知原來呢味真係班「佬」喜好。

出奇地連我表姨甥女都鍾意，實在無唔整的理由。

晌香港我已經多年無整過因為自己唔食，每次都揀瘦肉部份及梅菜係咁二食下，今次聚首一堂居然個個想食實在奇景啊。

呢味嘢其實唔難整，當然有個自家心得晌裡面，老老實實今次個汁我非常滿意咁囉。

晌加拿大買餸比香港貴得多，但係勝在你要乜都肯切比你。

我同呀姨晌度左睇右睇揀一塊大五花肉，應該夠晒有凸啦。

呀姨每次煮大茶飯都好緊張，佢一定會揀最好最靚嘅肉，又會每個步驟都好細緻咁記低。

而我就看似漫不經心咁，又會安撫呀姨唔使緊張一切在我手中。

其實就好似信仰中，我每次都好心急好急想上帝成就我心所想，而上帝就會慢慢為我作工或者叫我學會忍耐。

材料：

豬腩肉一大件      大約半斤或以上

梅菜    2棵(最好莖多葉少)

南乳   半磚(如果細南乳就用一磚)

生抽   適量

老抽   少許

冰糖   2粒

(每粒大約手指公咁大又唔好大過腳指公)

酒    1湯匙

另備薑、蔥

做法：

1. 煮用一煲薑蔥水，放塊肉用細火煲30分鐘

2. 煲完放入冰水沖至豬肉降溫電晌豬皮面篤洞，然後徹徹底底吸乾水份

3. 完完全全索乾水後就煎塊豬肉，如果你想塊皮好深色可以先搽一層老抽

我就只係就咁煎到金黃色，越金黃色炆出來越靚

4. 煎好後切件，唔好咁快切到細細件因為豬肉會收縮，你切得太細炆起縮得太多後會變硬

5. 甜梅菜浸水、榨乾再切粒，然後爆香，加南乳兜勻，遂少遂少加水，直至開稀南乳後加少許生抽、老抽、冰糖

6. 最後加紹酒，試味，如太鹹加冰糖、唔夠鹹加生抽，煮到個汁夠味後加入豬腩肉煮5分鐘

7. 將豬肉撈起放入蒸盤中，放汁同梅菜鋪面

8. 隔水大火蒸 2小時(期間要小心乾水、加水)

9. 兩小時後豬肉完全淋身就盛起，梅菜同汁就翻煮加少許生粉水煮到杰身再淋上豬肉上就完成