為一刀而來 : 甘棠燒鵝

食友從外國歸來，又係時候聚下，今次訂到幾位食友聽左好耐但未曾一嚐既甘棠燒鵝，就一齊試下燒味及鵝類菜式。

酸薑皮蛋先打開胃口，皮蛋睇到流心，食落同睇到一樣係好貨色。

餐前小碟既中必點既甘一刀叉燒上檯，叉燒色澤吸引。

入口先是焦香，再來是豐富油潤口感，最後肉香慢慢在口中迴蕩，如果話係為左甘一刀到來都唔誇張。

小碟再上鴛鴦紮蹄，紮蹄口感實在，不過更喜歡碟中既美味腐皮。

韭黃鵝紅每件份量不少，鵝紅味道剛好不會因浸在湯中而過鹹，入口軟滑鮮甜。

邪惡既燒珍肝不是人人都岩食，今晚這個帶焦香又軟熟，自己都忍唔住食多幾舊。

份量澎湃既一品鵝煲送上，煲中材料豐富包括鵝件、鵝翼、鵝腸、鵝肝等等，難得是各種不同部位都煮得剛好不過熟又入味。

主菜之一既甘棠琵琶鵝先是原隻上檯，大家影完相再切件上檯。

琵琶鵝燒得靚之外，入口皮薄香脆，咬落油香滿瀉外，肉身又是帶焦香而肉味又不只一個層次，比起燒鵝這個更值得一試。

湯品點了西洋菜陳腎牛鰍魚豬踭湯，成座山既湯渣好似bouillabaisse咁誇張。

再睇下湯既色水就知有幾濃。

飲落既鮮甜度係幾碗湯濃縮埋一碗既感覺囉。

飲完湯重有主菜既蝦子柚皮鵝掌。

鵝掌睇落雖好似略淡色，但食落都夠濃味，入口離骨又夠槳口，另柚皮處理得好好，落刀一刻已知十分軟滑，食落無渣無根又夠味，比起鵝掌自己更欣賞柚皮的出品。

四大發明點左陳皮炒河，河粉有鑊氣也乾身。

甜品係陳皮蓮子紅豆沙，紅豆沙煲到起沙係基本。

蓮子夠化加上香氣撲鼻既陳皮香，甜品也是水準之上。

食完大家都飽到上心口而滿意既一餐，而呢舊甘一刀會係大家食完又想再黎既源動力。

甘棠燒鵝

地址：加路連山道88號南華體育會1樓

Tel : 3580 2938