今日包包午餐食蜜糖薯仔鹿兒島和牛粒,睇落去好似好架勢。

純粹係昨日買了包和牛粒咁今日就煮比包包食。

平日煮比自己可能加少少鹽同胡椒煎完就食,但包包唔食得黑胡椒無,汁佢又唔歡喜。

整汁又唔知整乜好,雪櫃有幾個薯仔就不如整薯仔和牛粒。

包包好鍾意,佢連薯仔都話好食。

佢從來都唔知道我8點幾起身煎定薯仔粒,又諗定個汁點煮。

個汁我加了少少薑等個味道多一份層次,而且驅寒~

但小朋友又唔能夠食太多薑否則好易喉嚨發炎呢,

昨日大少爺同教友傾計先明白包包就係食得太好,所以人仔細細好刁咀。

唯有繼續錯下去.............................哼(唔認錯的哼)。

 

材料:

牛肉粒          12粒

(大家可以用普通牛肉做呢)

薯仔   2個

蒜頭   3粒

 

汁料:

生抽    1湯匙

蜜糖   1.5湯匙

(最好用燒烤蜜糖可以高溫使用)

鹽   少許

薑蓉   隨意

水   2湯匙

 

做法:

1. 將薯仔切粒,燒熱油鑊要好熱就放薯仔,一唔夠熱就會黏底甩皮

2. 煎至各面轉色就加1湯匙水,蓋上鑊蓋轉小火焗煮2-3分鐘,呢個做法會令薯仔個心都會熟

3. 開鑊蓋後再兜一兜直至水份乾及夠金黃色就可以上碟備用

4. 汁料全部撈勻備用

5. 和牛粒融雪後煮之前30分鐘放室溫,令牛肉裡面唔會凍,否則有機會裡面凍的。

6. 煮前用少許生抽、糖、生粉撈一撈

7. 放入鑊煎至半成熟加入蒜頭

8. 加埋薯仔回鑊兜勻

9. 倒入醬汁兜勻至慢慢收汁便完成


 【食譜】香氣撲鼻!薯仔和牛粒

 https://www.facebook.com/taisiu9