女神溫碧霞與老公北海道度中秋慶祝二人世界 欣賞紅葉雪山 日日浸溫泉

女神溫碧霞(Irene)與型男老公何祖光（Kenneth）早前鬧出小風波，雨過天晴後，兩人感情變得更加恩愛，Irene與老公趁中秋節放假，兩人飛到日本北海道享受二人世界，人月兩圓睇紅葉觀賞雪山慶祝中秋節，浪漫到極！

兩人在中秋前一天（３日）出發飛到日本北海道，抵達札晃後逗留了一天，馬上出飛到二世古，觀賞雪山及浸溫泉，還四圍享受日本美食，目前仍身在二世古的Irene心情靚爆，說：「玩得好開心呀，北海道秋天天氣好舒服，滿山紅葉好靚呀，我地仲去咗睇雪山，靚到不得了。（有冇浸溫泉？）梗係有啦，日日都浸呀，一路欣賞著紅葉美麗風景一路浸，我們特登全程都租住溫泉度假酒店，瞓醒就浸，日日都好似歎世界咁，完全放鬆曬。」

Irene表示再玩多幾日才返港，她笑言:「有可能唔捨得返港架，呢度實在太舒服，天氣涼爽，風景又靚，因為呢度空氣好，又空曠，中秋節嗰晚北海道月光好大好圓又特別光，仲滿天星星，但我同老公好掛住仔仔Xavier，我地同仔仔每日都視像通話，幾唔捨得離開北海道都要返香港。」