【湯水】潤肺、防乾燥！無花果滋潤茶

一到轉天季嘅時候，就一定要好小心，因為有少少出錯，小小豬個濕疹壞朋友又嚟攪佢就大件事啦！

除左要多多塗CREAM保濕皮膚之外，都要煲多啲滋潤嘅涼茶俾佢飲先得，所以就煲個無花果滋潤茶啦~

其實我都幾鐘意煲無花果，因為小小豬鐘意飲之外，仲係非常有益，可以潤腸解渴，減少口乾情況同埋防止皮膚乾燥，所以得閒就煲多啲，等小小豬等小小豬潤一潤啦！

材料都好簡單，我依個份量煲出嚟就有大約八杯左右，依家天氣都凍凍地，所以都唔煲太多放雪櫃(唔想凍飲嘛)。

材料：

無花果約30粒、果皮1小角、淮山約5-7塊、南北杏約1湯匙

做法：

1. 果皮先浸軟去囊；其他材料用清水浸約10分鐘

2.煲內放約2.5L水，然後加入果皮

3. 待滾起後，加入所有材料

4.先用大火加蓋煲約15分鐘

5.再轉慢火加蓋煲多45分鐘

6. 最後再焗15分鐘，隔渣後就可以飲得啦

雖然今次加果皮同淮山一齊煲，不過依舊係以無花果為主角，所以依然係甜甜地，所以小小豬又點會唔鐘意，仲會自動自覺去斟嚟飲添！

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！