【小小豬廚房】薯片玉子燒

宅在家中的日子又嚟，小小豬話佢最近睇圖書學整一個薯片玉子燒，所以就想整嚟俾我地來一個開心下午茶哦~

其實依個係小小豬係學校訂嘅兒童雜誌入面其中一個專欄，嗰本雜誌佢都睇左好多日，既然屋企又有齊材料，就得小小豬變身做小廚師，整個好味下午茶啦！

依個薯片玉子燒全程都係佢自己一手一腳整(只係開火煲嗰個步驟就我係旁邊幫下佢)，佢仲超級認真咁去整。

材料都好簡單，一包薯片、兩粒雞蛋、一片芝士同埋一片火腿~

先將兩粒雞蛋打散~

薯片先捏碎，再將芝士同火腿都一樣摵細細片~

然後將蛋液同埋芝士火腿片放入薯片袋內~

最後就將所有材料攪拌均勻~

摺好薯片袋後，然後放入渝沸騰的煲中煮大約10分鐘~

話咁快薯片玉子燒就食得，小小豬仲幫手切埋一件件，等我地Happy Share哦~

其實小小豬邊整我就邊擔心，總係覺得怪怪咁，但見到個完成品又好似得得地，食落個味又唔差都幾好食哦，真係有啲估佢唔到呀...哈哈哈~

老實講，初時聽到小小豬話要用薯片嚟整嘢食，我都真係好大個問號，薯片哦....用嚟煮，係咪真係食得落肚呀？都曾經有一刻想叫小小豬放棄，想食玉子燒不如就等我整。

但....最後我都係決定俾佢自己去整，咁都係一個下午茶，如果真係失敗都只係浪費食材，就不如放手俾佢試。始終佢都慢慢大個仔，有自己嘅主見，下下STOP佢嘅提議又點會長大呢？

有左依個成功嘅經驗，小小豬話佢依家充滿信心(佢食薯片玉子燒時真係超滿足嘅滋味樣)，之後由佢負責整下午茶我食哦~