【食譜】秋栗時節：栗子炆雞

是咁的，今日栗子炆雞，本身我無打算寫因為太家常，好多人都會識。

但喺FB無聊做直播又會有人想要，咁又無理由唔寫的，秋天好想食栗子用來炆雞最好味。

好多人以為剝栗子殼同衣好難，其實好容易架咋。

點剝？用手剝囉～命運是對手永不低頭……

我好日都唔會入街市，今日食完午餐就以誓要去入刀山嘅決心去買栗子。

呢種栗子圓姑碌，千其唔好買已經剝好晒殼既栗子，好多時都有陣怪味。

原因係剝好既栗子好多時都係用藥水去整走啲衣，所以殘留一陣怪味，寧願自己剝！

將栗子放入微波爐叮40秒，用手指一摔就剝到。

如果無微波爐就可以用一個煲仔煲滾水放栗子入去灼一灼後，就用手巾包住，一摔就甩。

材料：

雞     1隻 

(用少少生抽、胡椒粉、生粉去撈勻醃半個鐘或以上)

栗子    1磅

(要買多少少因為實有爛嘅)

薑幾片、蔥幾條、乾蔥頭   6-8粒、蒜頭  2粒，也可以自己配搭 

汁料：

蠔油    1.5湯匙

生抽    少許

糖   2茶匙

水    蓋過雞面

老抽    少許

麻油及酒   少許

另備生粉水　少許

做法：

1. 先爆香雞件至半熟盛起備用

2. 將所有薑、蔥、蒜等等爆香，雞件回鑊兜勻

3. 加蠔油兜勻再落生抽少許、糖、老抽兜一兜(也可以贊少少酒)

4. 最後加水至蓋過雞面滾起後就轉中小火

5. 炆大約 40分鐘試一試味，唔夠味加多少少生抽，最後加生粉水兜至收汁

6. 熄火後加少少麻油就done