【食譜】葡國雞

經過兩日澳門之旅再休息一日，終於又要繼續努力去做接咗嘅工作。

一諗到今日已經星期二，我要幾日內完成5個食譜去交，仲有其他宣傳稿要寫就想逃避現實。

澳門之旅好美滿，美滿嘅意思除了住間好舒服又新嘅酒店之外，還有包包玩得好開心，佢亦都好乖！

就算食fine dining都會坐定定咁食，喺酒店房佢又好開心咁不停走來走去感覺新鮮，又帶過佢去兒童樂園佢又玩得好盡情。

所以我好期待帶佢再去九州，相信佢會懂得享受旅程的。

喺澳門最唔爭氣係我想去一間葡國餐廳但因為太老定無訂位結果無得食，又要趕返酒店坐纜車唔可以等位。

於是去就近一間葡國餐廳食晚飯，那間餐廳可以用「唔好提」去形容，雖未到災難級但都極不滿意。

一直想食葡國雞但無食到返屋企就自己整，從前整葡國雞會喺醬汁方面落手，所以雞肉本身未必可以太入味，而炆得耐雞肉又變得唔好。

而呢個做法就係先用黃薑粉、鹽等等去醃佢，煮嘅時候用椰汁、奶等等煮到佢出味。

佢容易煮加上雞本身用麵粉去醃，個汁唔需要炒麵粉，還有黃薑粉不同於咖哩粉，黃薑粉係唔辣嘅。

下次我想試整非洲雞～

你睇下每件雞嘅顏色都好靚下！

材料：

鮮雞      1隻(切件)

醃料：

黃薑粉    3湯匙

鹽    1茶匙

糖   1茶匙

麵粉    2.5湯匙

油      半湯匙

汁料：

椰漿     200ml

鮮奶    200ml

水    100ml

鹽     少許

月桂葉    3片

另備：

薯仔    2個(切大粒再焗至金黃色備用)

番茄仔    6粒

洋蔥    1個切件

蒜頭    2粒

做法：

1. 將醃料攪勻後再倒落雞件中撈勻醃3小時以上

2. 煎香雞件盛起備用

3. 原鑊爆香洋蔥及蒜頭

4. 倒入椰漿、奶、水、加鹽、放入月桂葉煮滾後就放雞件及已經焗好薯仔粒及小番茄

5. 炆大約20-25分鐘後熄火，可以分次或一次過放入焗盤灑上椰絲

6. 用200度火焗10分鐘或以上便完成