【湯水】趕走冷氣病！生薑紅棗杞子瘦肉湯

等小小豬放興趣班時，上網見到有朋友仔介紹依個生薑紅棗杞子瘦肉湯，話可以對抗冷氣病。

咁我見佢講嘅症狀小小豬又好似有有地，咁見又真係好易，所以就試下煲嚟飲啦。

其實咩叫做冷氣病？咪就係因為天氣熱，咁我地就會成日躲係冷氣房內，又食雪糕、生冷食物或飲品，咁就係對身體過度受寒，很易造成冷氣病。

常見嘅症狀都好似感冒咁，都係流鼻水、手腳冰冷、疲倦等，不過只係冷氣房內先會明顯。我地一家三口都有鼻敏感，所以係冷氣房情況下就更加嚴重，見都係幾樣材料，所以就試下啦！

材料只係需要四樣，紅棗約20粒、杞子一湯匙、生薑三片、瘦肉約$30。

依四樣加埋一齊就對能滋養臟腑，滑潤肌膚，而且仲可以補中益氣。飲多啲就可以提升陽氣，兼能強化脾胃嘅湯水！

做法：

1. 將紅棗去核切半；薑去皮切片；杞子浸洗備用

2. 瘦肉洗淨汆水，由於今次煲嘅時間唔需要太耐，所以將瘦肉切細舊啲，咁可以更加出味

3. 煲內放約2.5L水，然後加入薑片

4. 待滾起時，加入所有材料

5. 然後用大火加蓋煲約15分鐘

6. 再轉慢火加蓋煲多1小時

7. 最後加入少少鹽調味(真係少少好啦...…因為太多會影響個味)，就可以飲啦

其實煲嘅時候廚房充滿紅棗味，我都有丁點擔心個紅棗味太濃，個味會好怪怪的。但入口時又唔算太覺重味，清清地又唔錯~

雖然唔知係咪對冷氣病真有幫助，不過啲材料都係補血氣嘅，所以飲多啲都冇壞，尤其女士們飲多啲都係一件唔錯嘅湯呀！ 

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀。不過杞子就偏溫補，所以一般在沒有感冒情況下先可以飲用！