【食譜】雜錦海鮮意粉：做法一鍋到尾 超簡易！

每逢星期六、日都帶包包去街、去玩，玩完就唔想煮，於是包包就會跟住大人去食。

所以一到平日我就盡量煮得就煮，希望佢食少啲味精，今日午餐我只係晌雪櫃望下有乜煮得比佢食。

諗諗下不如整一鍋到尾既意粉，即係一開始連意粉放落鍋，唔做過冷河程序。

出來效果好好！意粉既軟度剛剛好，又索埋啲汁，加上其他配料既鮮甜味，簡直精華一樣！

包包仲食晒2碗咁多，好開心呢～

其實呢個既配料大家可以自行調配，你喜歡放乜就放乜，最重要個汁用乜做主打。

材料：

意粉   80-100g(自己睇下幾多人食)

洋蔥   1/4個

甘筍   1條

露筍    一小扎(切段)

蒜蓉香草牛油   適量(呢個早前有寫過食譜，否則大家用普通牛油已可以)

蝦、三文魚   隨意

淡忌廉   100ml

鮮奶    100ml

鹽    少許

做法：

1.牛油爆香洋蔥、甘筍。

2.加入淡忌廉、鮮奶、水煮滾後就加少許鹽。

3.滾起後加入意粉，蓋上蓋用中慢火煮大約7分鐘。

4.期間要攪下佢免得會痴埋一舊。

5.7分鐘後就放埋其他材料，再煮多7-10分鐘或自行睇時間。

P.S.如果想意粉 Al dente就唔好煮太耐；

想比小朋友食就可以煮耐少少，喜歡的可以灑上芝士粉。