成日都話，要維持身體健康，足夠既運動係必不可少，但係好多人誤解咗，以為做運動一定要做劇烈運動先有效。但事實上，最近就有研究指出，如果做親都係劇烈運動的話，有機會令我哋壽命短啲。

唔少科學家同醫生都講過，我哋要多啲做運動，而劇烈運動最好就只係間唔中做一次算，每日keep住做既最好都係一啲輕量級既運動，例如慢跑。喺2012年，丹麥就有研究人員做咗一份以單車手為研究對象既報告，發現踩得劇烈既單車手，比起嗰啲踩得較為輕量既單車手更長命；但係，報告出咗無耐後，又有研究人員認為做得多劇烈運動唔代表對身體既保護多咗，更加無證據證明同壽命長短有任何關係。

於是，又有最新一份刊登喺The Journal of the American College of Cardiology既研究發表，今次唔再只集中以單車手作為研究對象，研究人員於是決定睇埋慢跑呢樣最受全球歡迎既運動。研究人員揾咗1098位遍及唔同年紀既成年男女，佢哋全部平日都有慢跑既習慣，報告入面仲詳細列出佢哋每星期跑幾多次，每次跑幾耐。

結果發現，呢啲平日有慢跑習慣既人，比起平日完全唔做運動，或者做親都係劇烈運動既人都比較長命，而且最好既係每星期慢跑1至2.4小時；而負責相關研究既科學家最後就解釋返，做劇烈運動無疑會令我哋易啲瘦，身型更fit，但亦都因為劇烈運動會令身體尤其係心臟既肌肉帶來一啲負面影響，所以第日做運動，都記得要慢。