做唔同嘢，都有適佢既Timing，身體亦都唔例外。要維持身體健康，平日盡量唔好搞亂我哋既生理時鐘。如果由朝早6點開始計，到夜晚11點，我哋既生理schedule又應該係點呢？記住下面呢幾段時間，係啱既時間做啱既野。
6 a.m - 8 a.m
有專家表示，朝早6點時，我哋既血液比較粘同容現出現凝塊，令血壓急速上升，呢個時候人體血管既活動能力最低。所以，朝早6點到8點期間，心臟病發同中風既機會比起其他時間高出近五成。呢段時間最好放緩動作，盡量令自己既心情保持平靜、悠閒，更加唔適合一早就處理任何工作上既嘢。另外，喺7點呢段時間，都係花粉症，偏頭痛同類風濕關節炎呢類痛症發作既高峰期。如果患有呢類症狀既人，專家就建議每晚臨瞓前，放一杯水和藥物在床頭，以備不時之需。
9 a.m - 12 noon
如果你當日有手術要做的話，最好就獲安排喺朝早9點，因為美國一個研究發現，朝早9點至下午12點呢段時間，發生醫療失誤既機率最低；至於「風險」最高既就係下午3點到5點期間，有指係因為負責手術既醫護人員同患者都等得太耐，累積咗唔少壓力而容易出錯。係10點至11點呢段時間，都適合進行一啲思考強既任務，例如考試，或者公司滙報咁，我哋既大腦處於最高性能狀態，消化、記憶信息都持別強；另外，接近中午時段，人類既邏輯推理、短期記憶既表現最好。
1 p.m - 4 p.m
呢段時間啱啱好食完飯，最困擾既都係飯氣攻心，令我哋無辦法集中精神做嘢。所以，食完飯後可以食返一條香蕉，等個人感覺上無咁頹。如果你打算當日晏就做運動的話，你就更應該係1點就食野，咁你既身體就有足夠時間消化，專注將含氧血液到肌肉。美國科學家Dr Boris Medarov揾咗4,835個人做研究，分別叫佢哋喺唔同時間做運動，結果發現人體既肺功能到咗4、5點，接近黃昏時最好，所以，最適合喺呢段時間做一啲帶氧運動。
5 p.m - 7 p.m
如果你喺下午時做咗運動，呢段時間就最好食返啲有豐富蛋白質既野食，用嚟修補肌肉同恢復血糖水平。不過，上面提過，愈接近傍晚做運動先係最好，尤其一啲力量型運動，好似做gym、游水、打波咁，係6點至8點呢段時間會最好，因為人體既肌肉力量、握力同心血管效率、靈活性都處於高峰。同時，7點到第二朝6點呢段時間，都要小心我哋既飲食，當然唔包括要戒唔飲水，但呢個時間起食啲乜都影響我哋既體重。
8 p.m - 11 p.m
如果你有飲咖啡既習慣的話，最夜都唔好過8點先飲，因為咖啡既「壽命」有3至5個鐘，分分鐘擾亂你睡眠。對於一啲患有哮喘既人嚟講，每逢夜晚尤其係凌晨2點至4點最容易發作。所以，有研究就指出，最好既預防方法係每日定時用噴劑，而夜晚10點就係其中一個最佳時機。另外，到咗夜晚11點，應該係上床瞓教既時間，但有唔少人夜晚會出現消化不良既問題，因為胃酸一般係夜晚8點開始分泌，凌晨2點就係最高峰；如果唔想有胃酸引起既唔舒服，可以試吓躺平身體，再用書或者磚頭抬高對腳，咁做有助增加腹部壓力。
