【食譜】小朋友都岩食— 營養魚餅

是咁的，我每日都盡量去諗新菜式比包包，因為我希望佢每日都有新鮮感，同埋我總覺得媽咪責任就係要做好菜式比仔女。

即使而家佢未必懂得味道這回事，但都唔可以求其，加上包包之前絕食既一段日子，我希望每一餐只要佢肯食，都係有營養既。

我上網睇到個豆腐雞肉漢堡，於是就改良成為小朋友食物。

臭包絕食後唔太食蔬菜，我就混入雞肉中，加上用豆腐做出來效果比較軟熟。佢不停咁食呢～

材料簡單又易做，媽咪真係「哼」得一句句囉。

材料：

雞柳肉     4條 (或雞肉碎)

豆腐        1/2件

紅蘿蔔粒   適量(先蒸熟)

菜粒         隨意(先灼一灼)

鹽            1/8茶匙

生粉         1茶匙

做法：

1. 豆腐先壓碎，隔去水份備用

2. 雞柳肉用肉搥剁鬆，或可以用刀背大刀拍打

3. 然後可以用攪拌機攪爛或剁爛

4. 加入鹽、紅蘿蔔粒及菜粒順下方向攪

5. 將豆腐放入雞肉攪勻

6. 再放生粉攪一攪就可以做成圓餅狀去煎。

貼士:

*比小朋友食只需要煎至成形、少少金黃色就去蒸多10分鐘；因為如果要煎全熟就會太焦了，所以成形及轉色便可以去蒸。

*鹽一定要在放豆腐前撈勻，否則豆腐會出水的。

*如果只給大人食，咁可以加多少少鹽、黑胡椒，配料又可以自己選擇的。