【湯水】杞子圓肉菊花茶

早幾日去藥材店買材料煲蘆根薏米雪梨水時，我都買左少少菊花諗住煲小小豬至愛嘅菊花茶。店員就教我加埋杞子同圓肉一齊煲，可以好味啲之餘又可以對眼晴好，所以就嚟煲依個杞子圓肉菊花茶啦。

店員話依三樣加埋就有清熱解毒及明目嘅作用，見佢一向都冇介紹錯，所以我又嚟試下啦！

材料：

菊花　約十蚊

杞子　約半湯匙

圓肉　約一湯匙

做法：

1. 先將所有材料浸洗半小時

2. 隔水備用

3. 將全部材料放入1L水煲

4. 待水滾後轉用慢火煲約45分鐘

一向我都冇俾小小豬飲太甜嘅嘢，所以原本我都冇打算加冰糖。

不過我另一位老細就叫我唔好煲太淡，話冇咁好飲哦。

最後....我都落左一粒冰糖嚟調味，唔太甜得嚟又有少少甜，滿足我兩位老細啦~

5. 落冰糖之後就再煲多15分鐘，之後就焗多30分鐘等佢出味啲啲。

待涼後入樽，就可以飲得啦~

小小豬同樣地見到啲顏色初時又有啲抗拒，係飲落飲得出啲菊花味先肯繼續飲。

但其實個味道咪又係同普通菊花茶冇分別，加左啲冰糖一齊煲仲好飲啲，連老公都話好飲，仲飲一次過飲左我兩大杯，真係話呢...…真係俾依隻豬仔激C呀！