今天和朋友一起去了柴灣執拾一下我們迷你倉內的雜物,動手前順便在高威閣下面,一間出名食豬扒的小店吃午飯。其實這小店我在多年前已試過,他們的豬扒確實是幾好味的,而今天我重溫了好耐冇食過的咖喱豬扒飯。跟多年前一樣,豬扒都是即叫即煮,所以一般上菜都會比較耐一點,而這裡因舖位面積比較細,所以很多年前已很前衛地建起"Open Kitchen",在客人面前煮食,廚師的一舉一動全部一清二楚,透明度很高唷!在櫃枱俾完錢後,即見到師傅從雪櫃裡取出一塊約6寸長的豬扒放入炸爐炸熟,而在一旁就起鑊炒香少許洋蔥,跟著將事先預備好的咖喱膽倒入去煮熱,加入少許花奶成咖喱汁;最後將炸得酥脆的豬扒切件,加上一大殼咖喱汁淋上白飯上,完成。以上動作全程由一位師傅包辦,記住佢每次並唔係只預備一碟,而是3,5,7碟,仍能駕輕就熟,好功夫!


咖喱豬扒飯端到上來,雖然沒有一般咖喱一上枱的那種香噴噴,相反地勝在夠溫和,突顯咗豬扒的酥香,讓人一見就想試番啖先!相隔了咁多年,豬扒的質素和份量並沒有因物價上升而改變,仍然都是一碟飯跟一塊大豬扒,豬扒醃得入味,炸得微焦鬆軟剛剛好,配上微微偏甜的咖喱汁,異常地匹配;值得一提嘅係佢哋轉用咗類似珍珠米/蓬萊米煮飯,用來拌咖喱汁同吃,真的好味非常,我和朋友轉眼已食哂成碟飯,汁都撈埋!

除咗豬扒飯好食之餘,呢度有一樣嘢都幾特别,就係招呼!雖然幫襯得小店,都預咗係大排檔自助形式冇特别好嘅service,但作為顧客,亦不至於要被呼呼喝喝吧!我哋一坐低想叫嘢,那位坐陣的女士已大嗌“叫嘢埋嚟俾錢呀!”,我唔係好明,佢鋪位已經窄,人客出入係唔方便嘅,更何況佢全間舖只有4-5張枱,已包埋擺咗出路邊的兩張枱,而當時是下午茶時段,只有3,4位顧客,唔會忙…加上佢並沒有快餐店式的收銀機,只是人手計數俾錢,點解唔可以出嚟收錢,而一定要客人相就呢?……但唔緊要,每間公司有自家營運規矩,我會尊重!但當我付出媲美灣仔中環嘅價錢,$43喺柴灣食一碟飯,我後加套餐價$10一杯凍檸茶(即是連凍飲$53)都同我講“下次叫嘢食時要叫埋,唔可以後加!”……佢嘅語氣係十分唔禮貌果隻,我真係覺得有點兒過分!講真,就算好味到像那些幾廿年老店,美味只此一間,相信都不至於咁嘅態度,更何況此店的豬扒雖然好味,但未至於唔食唔得……好似劉德華所講“今時今日咁嘅服務態度係唔夠嘅”,作為消費者,我沒有回應,只有選擇下次唔會幫襯,願佢自求多福。

今日的食評帶有一點點的自我情緒,希望各位唔好介意?!持平的説句,此店出品算是好味有水準的,雖然唔係咁特别,地點亦唔係太方便,但如果大家經過的話都係值得一試嘅。



 https://www.facebook.com/myplayground2015