TSUM TSUM蛋糕預祝生日

仲有一日就係小小豬生日，見今日又係星期日，所以就約埋各位家庭成員，一齊為小小豬簡簡單單咁預祝生日啦~

其實今日嘅預祝生日會真係非常簡單，只係一家人食個晚餐，之後就切個生日蛋糕...唱下生日歌等小小豬開心一番。

講起今年小小豬個生日蛋糕，其實我早幾日係無意中見到美心門市有一個TSUM TSUM蛋糕，我依個TSUM TSUM控見到時都已經尖叫起嚟，好想買嚟同小小豬慶祝。

無奈個蛋糕係冇得預訂，即係要親身去門市先知買唔買到，為左等小小豬有個靚蛋糕(當然亦有其中一個原因就係滿足我依個TSUM TSUM控)，所以今日我行左四間美心先買到。

當我搵到第四間見到個蛋糕時，嗰一種興奮心情真係難以形容呀！

單睇個包裝盒都覺得勁靚啦~

個蛋糕係咪好靚呢？搵得咁辛苦都係值得呀~

當然...唔鐘意TSUM TSUM嘅朋友就覺得只係一個普通鮮果蛋糕加個公仔擺設，但其實個TSUM TSUM真係好靚呀~

萬眾期待，我地食完晚飯之後，小型生日會就開始啦~

唔知大家有冇留意小小豬背後嘅字句，其實係好早之前小小豬同我講話開生日會係要貼生日快樂係牆上面(可能係學校有貼啦)。但...我搵左屋企附近都唔見有，最後小小豬就提意話自己寫上去啦，所以依四隻字仔係出自小小豬手筆呀！

食蛋糕之前當要影下相，不過小小豬就俾TSUM TSUM吸引住，唔多願意影相，真係激C我呀~

所以我地就快快手唱生日歌吹蠟燭啦~

哈哈哈....吹完蠟燭小小豬就已經將個TSUM TSUM據為己有，依個係一個硬膠公仔，唔可以食呀。但其實咁都幾好，可以KEEP耐啲嘛~

蛋糕方面，真係一個普通鮮果蛋糕，但CREAM就唔甜，個糕底都好鬆軟，各位家庭成員都話好食呀~

睇小小豬食得咁滋味就知係好食啦~

開開心心就同小小豬預祝左佢五歲生日，其實我都冇咩望，只希望小小豬可以每日都過得開開心心又健健康康成長，最重要係快啲戒掉啲壞習慣，做個人見人愛嘅小朋友就足夠啦！