動感科學園地 - 創意科藝工作坊

非常感謝科學園一直都咁愛錫小小豬，今次再次邀請小小豬嚟到科學園，參加好玩又學到好多智識嘅科學探究活動「動感科學園地 - 創意科藝工作坊」~

有別於前幾次的工作坊，今次嘅活動形式及地點都有啲更改~

今次活動的代用卷就$10一張，需要因應唔同攤位的代用卷數量，換取攤位遊戲証，大部分攤位都係需要2-3張代用卷~

另外，之前幾次活動都係金蛋下的走廊進行，今次活動就移到12W大樓的兩層場地，明顯係大好多，玩起上嚟都舒服好多呀~

哈哈哈...依個貪玩小小豬一入到場就已經開始急不及待要去做小小科學家，開始去唔同嘅探究工作坊攪攪陣啦！

第一個工作坊就係去我的色譜袋子，其實即係去為環保袋設計一下圖案~

工作人員先叫小小豬利用可水洗嘅MARKER係環保袋上畫公仔~

然後就利用酒精點係個圖案上，利用酒精分解原理，等個圖案有返色彩~

小小豬嘅製成品，以一向畫畫唔多靚嘅小小豬嚟講，我覺得唔錯啦，起碼係佢一手一腳去做，加上明顯比之前畫嘅人仔叫有進步，所以我地都有俾個叻叻佢呀~

跟住我地就去跳躍彈彈球，即係利用膠水同一啲化學物質，去整彈彈球呀~

首先就聽姐姐講解依個活動所涉及嘅科學原理，其實對於小小豬嚟講又真係深左啲啲，但佢都好專心聽呀~

首先就利用膠水加澎砂粉，之後再攪成為一個固體~

之後就搓成一個圓形~

咁就成為一粒彈彈球啦~

之後就再利用膠水加唔同種類化學物質，變成唔同質感嘅膠形狀呀~

最後當然可以拎埋三款製成品返屋企再玩啦~

第三個工作坊就係上上落落升降機~

首先就係由負責人向小朋友講下個原理，依個心急豬已經急不及待要玩啦~

哈哈哈..小小豬就最鐘意搭升降機，依家有得俾佢自己整，佢都不興奮，好認真咁去完成佢嘅傑作呀~

最後經負責人幫忙整埋個路線~

完成啦...依兩父子仲即玩左好幾分鐘呀~

之後我地就去玩科技伙伴幻影箱，即係整類似走車燈嘅小工具呀~

活動前當要又聽姐姐講解先啦~

好啦...開始動手了，依個工作坊可以話係小小豬自己一個人完成，見佢都整得有板有眼呀~

當然最重要步驟都有哥哥幫佢手啦~

完成啦...自己一手一腳整就特別有滿足感呢~

我地休息一陣之後，就繼續去玩。今次就係齊齊印一番，即係利用各種蔬菜嚟印一副靚圖畫呀~

聽完姐姐講解之後，就到小小豬大動手啦~

小小豬嘅完成品都唔錯啦~

之後我地去創意科學畫廊，去扮藝術大師畫圖畫呀~

我地依個豬大師嘅藝術天份有幾高，真係唔係人人明佢想畫乜呀。不過比起之前嘅傑作，都已經叫做有個主題，同埋畫功好左好多啦。算啦...藝術依一回事係要慢慢嚟啦，起碼佢都好ENJOY同專心去做佢依個塗畫過程，所以都可以接受啦，希望再大個仔啲可以再畫好啲啦~

嚟到最後一個工作坊，就係去玩創建網格球，即利用飲筒及毛毛條整個立體形狀~

看似簡單但其實又有少少難，因為個接口位要好仔細去做先可以整得靚。好在有姐姐幫手，可以快快手完成啦~

一連玩左六個工作坊，雖然每一個工作坊小小豬都係做得好投入，好認真咁去做，不過對於佢嚟講，彈彈床又點會唔係佢至愛呀！

見小小豬今日整體表現都唔錯，所以就獎勵佢，俾佢跳一轉啦~

其實我真係好鐘意嚟科學園參加啲科學探究活動，因為有得玩之餘，又可以學到嘢，雖然小小豬或者唔會太明白當日道理，但唔多唔少都有提升都興趣，因為佢都真係會成日問...點解會變成彈彈球....點解個幻影箱入兔仔會跳...好多點解...點解...，即刻變成問題兒童呀！

最緊要就係每個工作坊嘅工作人員都係好細心咁同大家咁講解，尤其見細細粒嘅小小豬時，佢地會特別關顧佢，仲會好主動幫佢，令到小小豬每完成一個活動，都會有好大嘅成功感呀！

 「動感科學園地 - 創意科藝工作坊」嚟緊仲有三場活動(6月14日、21日及28日)，由下午1時至6時，大會設有少量門券於活動當日即場發售，有興趣朋友仔都可以入去玩一轉呀！

除左依個活動次之外 ，其實科學園不停期都會舉辨唔同主題嘅科藝工作坊，大家亦都可以緊貼佢地嘅FACEBOOK專頁，留意最新活動，咁就可以盡快上網報名啦！

 動感科學園地 - 創意科藝工作坊

 https://www.facebook.com/kinseymama