星馬美食薈萃自助晚餐

話說早排小小豬先問我地幾時可以再帶佢去食自助餐，就係依個個時候收到悅來酒店嘅邀請，小小豬知道後都不知幾興奮，真係非常感謝悅來酒店一眾公關哥哥姐姐呀~

悅來酒店係5月至6月期間，推出「星馬美食薈萃自助晚餐」，安排左多地道嘅『星』『馬』美食~

一入場就俾啲可愛小熊貓吸引啦~

我覺得依度環境都幾寬敞，而且都算幾靜，所以感覺都係好舒服。最特別就係場內設有電視播放，我都係第一次見呀(可能係我少去食自助餐啦..哈哈哈)~

對於我嚟講，食自助最重要就一定係刺身、冷盤同埋甜品。

小小豬都要自己去搵食呀~

嘩...有生蠔食呀，佢地仲補給得非常密，而且都好新鮮，我地兩個食左大大話話都有差唔多三十隻呀~

啲刺身都好新鮮呀~

沙律吧及冷盤都加入左好多『星』『馬』原素呀~

雖然甜品種類比起上來選擇都算少，不過勝在啲甜品味道都唔差，完全唔會覺得好甜，尤其係佢嗰個朱古力慕絲蛋糕，真係要推介呀~

當然唔少得小小豬最鐘意嘅朱古力噴泉~

亦都係因為『星』『馬』關係，多左好多特吃嘢食，好似有牛油蝦、串燒同一啲炸物呀~

熱盤中當然都加入不少『星』『馬』美食，每款我都有試少少，開頭都好怕會太辣，但食落感覺又唔錯，只係少少辣的，好香口哦~

強烈推介依個肉骨茶，個味好香濃呀~

場內仲有一啲特式飲品，分別有多瓜露汁、金桔水和鳥梅汁~

其實三款味道都唔錯，不過金桔水就最合我心~

另外仲有咖啡提供呀~

我最鐘意就係有即叫即整嘅斑蘭餅同埋刨冰呀~

仲有依個千層糕，煙煙韌韌，推介呀~

除左場內『星』『馬』飲品之外，公關們仲為我地準備左三款靚靚特飲呀~

小小豬大叫好飲，轉眼佢就已經KO左杯飲品啦~

食自助餐當然唔少得小小豬至愛雪糕~

小小豬食得好滋味呀~

整體上食物都好有水準，好多都好有特式，所以我真係一日食左好多『星』『馬』美食，好滿足呢！

不過我覺得除左美食吸引之外，佢地嘅安排都係非常之好，因為有一個遊戲室可以俾小朋友係入面玩，咁我地家長就可以放心食...食....食啦~

正當我地食飽飽準備離開時，職員哥哥就為我地送上靚靚小蛋糕~

好靚嘅熊貓蛋糕呀~

整體上我地都真係食得非常飽飽又開心，不過有一事我一定要同大家分享，要讚一讚佢地嘅服務員呀！

事緣當我去洗手間時，我放低左個電話係枱上，叫大肥豬幫我睇住。當我行返去座位時，佢地兩父子就唔見左，只見到有一位職員企係我地枱旁。原來佢地兩父子出去拎嘢食時冇帶埋我個電話，留左係張枱度，職員哥哥見到就企係度幫我看住個電話，仲提示我記得要小心啲。估唔到佢地真係好細心，所以真係要俾個GOOD佢地呀！