【食譜】應節賀年菜！百花釀海參（連浸發方法教學）

過年前廣告要出都出晒，最忙係整食譜比大家。

由2006年自己學煮同寫blog開始就背負著呢個使命，就係過時過節做下應節食物。

晌13年歲月裡面當然有不同食譜，又有啲改良版返做。

但每一年都希望做到新嘗試多試煮唔同類別食物。

今年就整海參，是咁的自小跟著老爸生活個個都話我食盡好食物，但個問題係佢唔識煮丫嘛。

咁我對食物認知都係由2006年開始，海味我只識發花...…膠。

仲有我本身唔食海參，細個老豆話啲曳細路會比人拋落海餵海參。

我於心何忍食呢？

但到今時今日乜都要試，加上朋友賣海味信得過又唔貴就買啲玩下啦。

不過唔係就咁炆，我係做「百花釀海參」，而個汁唔係用蠔油做而係用瑤柱水加少許調味而成。

做出來好好食呢！包包問包住係乜？我答佢：魚皮。

否則我答佢海參佢又實唔食呢。

材料：

海參       3條

蝦膠    1碗

瑤柱   3粒

鹽   少許

生抽   2茶匙

老抽   2茶匙

糖  茶匙

麻油   少許

生粉水   少許

做法：

1. 先用瑤柱加水小火煲45分鐘至出味，加少許鹽放涼後加入海參，等海參吸味

2. 可以放2小時最好，因為海參來身無味的

3. 唔用瑤柱水可以直接放清雞湯都得

4. 將海參中間灑上生粉或粟粉，釀上蝦膠

打蝦膠方法如下：

http://iamtaisiu9.blogspot.com/2017/06/s-delicatessen.html

5. 蝦膠面再灑少許生粉先煎，海參要完全索乾水

6. 煎至金黃色備用

7. 將瑤柱水加入生抽、老抽、糖去煮滾

8. 煮10分鐘後可以加麻油及生粉水做成獻汁就可以上碟

睇到呢度……我無理由唔寫埋發海參架。

首先要預備一個無油完全乾淨盒，將海參加水入盒浸，水蓋要過面的。

每12小時換一次水，每次換完水都放入雪櫃下格。

如果是兩日後...............

當你發覺隻海參軟身就可以開肚，如果仍感覺硬呢就再浸多12小時至1日。

剪開肚後就去走沙、石、內臟同筋，總之個肚有乜都拎晒出來。

之後可以用個無油乾淨煲加水，凍水落海參煲滾。

煲多10分鐘蓋上煲蓋焗浸至水涼就放返入盒浸佢12個鐘。

之後又用個無油乾淨煲加水，凍水落海參煲滾10分鐘熄火再蓋上煲蓋，焗浸至水涼就放返入盒浸佢12個鐘。

之後你摸佢夠軟身就完成，如果仍完全未軟身就再做多次焗浸。

將海參倒走啲水，再抹乾水可以放冰格保存。

煮之前可以煮一煲薑蔥水去出一出水。