【食譜】港式肉醬意粉

近來好鍾意食港式肉醬意粉雖則未去到瘋狂想食，但仍然纏繞心頭。

細個屋企無人煮飯就會買飯盒，而肉醬意粉係我最常食。

那些年住炮台山有好幾間快餐店而且真正價簾物美，而我從來都唔會堂食總覺得同唔識嘅人搭枱，非常難為情。

買完外賣就急步回家洗手換衫(在家我絕不著出街衫的)，然後晌肉醬意粉上灑上大量芝士粉，當時係天下間美味。

偶然又會約同學仔一齊買飯盒到我家食，又會同同學交換買飯盒心得，偶然會行去遠啲餐店試試。

到而家我非常討厭工廠式快餐店味道，千篇一律味道，再加上永遠圖不符實，見到都唔係太想食。

幸好，我早兩年終於研究到港式肉醬意粉味道，而今次再整有啲特別。

因為你見到嘅肉係 Beyond meat即係植物肉類，簡單啲講：素食，即係齋鴨齋雞齋魚蛋啲friend。

話說我本身想買牛肉，點知晌一田見到呢個Beyond meat，相請不如偶遇就買返屋企試煮。

老實講：打開包裝時覺得啲味有點伏，但當煮到入味都ok質感同牛肉都好似。

大家可以選擇整真。牛肉，或者如果有朋友愛肉醬意粉但唔食肉或者唔想食咁多肉可以一試

緊記：佢要煮到入味或者趁熱食先好食

當然以下食譜用真牛肉煮係一流，就係港式味道咁囉

至於我同beyond meat就應該告一段落

要是以後有緣能見你

今天一切都成往事

會是如歌 會是如詩

怕沒法遇..........................

我晌一田買呢隻，打開包裝聞陣味唔算討好，但煮落入味後就同牛肉差不多。

唔使醃的。

材料：

牛肉     1碗

(用真牛或植牛任得你)

洋蔥    半個

蒜頭   1粒

小圓番茄   隨意

麵粉   1湯匙

醬汁：

茄膏   1.5湯匙

茄汁   1湯匙(ketchup)

鹽  1/4茶匙

糖   1茶匙

水   180ml

另備意粉或飯

做法：

洋蔥、蒜頭切粒

將茄膏、茄汁、糖、鹽先撈勻備用

爆香洋蔥、蒜頭後加麵粉炒勻

再加牛肉

*如果用真牛肉就 用少少鹽、胡椒略醃

加入茄膏茄醬等等兜勻

最後加入水，如喜歡加小圓番茄可以加埋入去煮滾

煮到你理想杰度便可以淋上意粉或者飯