（網上圖片）
前幾日，經過間培訓中心，入去睇吓宜家興啲咩課程。除左NLP、溝通技巧果啲basic野之外，仲有「大企mnc攻略」、「善用linkedin的影響力」、「60秒自我推銷大法」、「從哲學角度立足工作世界」、「OL襯衫的藝術」、「職場兩性相處之道」、「音樂治療之旅」、「背包工作假期之旅」……嘩，都幾多元化。不過，有啲唔明，點解有啲topic可以當成為一個module、花4到8堂嘅時間用嚟上堂嘅？
大企mnc攻略，唔通係教你點入職facebook、google同linkedin呢啲大企？咁唔知會唔會教埋你點樣同tencent、JD.com同alibaba打交道、傾合作同簽一份可以收到錢嘅合約呢？善用linkedin的影響力，吓，咩仲要教呀咩？60秒自我推銷大法，隨時去BNI或者任何商會都可以學到領略到，係唔需要坐住班房去跟老師學呢！要從哲學角度立足工作世界？咁唔知又有無從化學角度立足工作世界、從物理角度立足工作世界、從生物學角度立足工作世界、從犯罪學角度立足工作世界之類嘅課程呢？咁其實，用哲學角度睇工作同普通人嘅角度，唔知有咩分別呢？我淨係知，做野最緊要嘅係get things done，做到、做好之後，最緊要嘅係：收錢，無論係作為employee定employer都係！其他，都唔太重要；唔知，呢個角度哲唔哲學、實唔實用呢？OL襯衫的藝術，well，我相信每位對fashion有sense嘅OL，都係專家，都可以教呢！職場兩性相處之道？Uber個founder Travis Kalanick絕對值得做分享嘉賓呢！咁唔知，係網球場上、籃球場上、band房中、廚房內、駕駛車廂內嘅兩性相處之道，又駛唔駛分開嚟教呢？例如，永遠唔好challenge在廚房攞住菜刀嘅女人同在車廂內hold住軚盤嘅男人？音樂治療之旅，好therapeutic呀！背包工作假期之旅，好romantic呀！只係，好難想像會係一間啲人為左做野而頂硬上攞張沙紙嘅傳統商業培訓中心，出現呢幾款比較無咁功利而又有趣嘅課程。
之後，我有幸參加左兩個workshop，聽吓宜家咩內容咩題目係可以吸引到人嚟聽；一個講創業，另一個講ICO同cryptocurrency，簡直大開眼界，好有得著。
首先，講創業嘅講者，一直不停強調，自己係創業中/成功過/失敗過sss輪迴過數十次，咁先有說服力同感染力。然後，就會開始同你講MLM、network marketing、聯盟營銷嘅好處，問你有無興趣加入、有無興趣賺錢、脫貧，因為已經透過呢啲方法賺左好多？咁你一定會答佢話有，無得拒絕呀，否則，你坐係度兩粒鐘為啲咩？既然，佢已經成功motivate到你個心開始動嘞，無人會再教你究竟點樣去運用MLM、network marketing、聯盟營銷等手法，去實行、執行個賺錢計劃；反而，身邊會有一大班人出嚟同你講，「只要比三千幾蚊上一個課程，就會掌握到成功做生意嘅方法，咁，你想成功嗎？」之後，你就神推鬼擁咁，比人closed左，自動波比人攞左你張信用卡嘞。至於第二個講座，係講ICO同cryptocurrency。講者佢先會講吓、比較吓，時下各種興嘅投資方法，例如炒細價股、炒衍生工具、外匯、波鞋、金幣嘅長短處。之後，就同你介紹吓究竟ICO同cryptocurrency係咩概念、點玩法、有咩風險要留意，仲簡介埋幾款宜家最值得投資嘅coin，聽落分析得好正路正派，搞到個人會心郁郁咁嘞。話題，就突然一轉，佢就問大家有無興趣投資，買吓掘礦機連散熱架套餐，一齊自己搞個商圈出嚟掘吓，有錢齊齊搵咁話。「投資一萬幾千只係小數目，求其買隻8字頭得幾毫子嘅股票都唔止呢個數啦，但倍升嘅力量，cryptocurrency點講都勁過股票啦，你無理由唔投資啩？」就係咁，你又比人closed左，自動波比人攞左你張信用卡嘞。
我衷心覺得主辦方好堅，首先可以搵到咁多生客/魚肯嚟；第二佢地嘅sales technique同motivation skill真係好恰到好處，搞到啲聽眾聽聽吓變晒做fans，聽出耳油，做closing嘅時候真係易過借火；第三係其實佢地嘅costing唔大之餘仲每次closing果時都有成十萬八萬嘅學費營收，而且仲可以用同一款教材不斷copy同做production生財，直至一、兩季後outdated左再發展過啲新野，成個operation同bd都做得好暢順好靚。我唔知道啲聽眾抱住咩心態嚟，不過，我係一個重視經驗行先嘅人，做咩野學咩野都好，除左聽人講之外，有咩方法好得過自己試一次呢？搞生意要讀課程先？不如用交學費啲錢直接用嚟搞生意好過啦。仲有ICO咁新咁顛覆世界，連一大批專業嘅會計師、律師、監管機構、政府官員、金融專家都未知可以點樣好好處理呢樣產物，你走出嚟話你係專家教人去做mining？咁樣同啲人係微信上面叫人買啲創仔股票散貨有咩分別？你就唔知賺唔賺，但係佢地呢？就肯定唔會輸，仲有機會賺突呢。
作為上進嘅人，係應該唔會介意學新野，亦唔會介意比啲錢學新野有用野，都唔會介意比錢去某啲商業學店學啲時興、有用而又可以搵到錢嘅market trendy野，但，可唔可以比啲誠意？比啲內容？比啲質素？比啲耐性呢？唔好覺得所有嚟聽你講野嘅人，一係斬起刀落嘅白痴、二係傻嘅水魚，得唔得呀？
