【食譜】非一般餃子皮！蘿蔔餃子

昨日休息狀態可以午睡一小時實在回魂感覺，好耐無午睡過，記得未生包包前只要下午晌屋企我一定午睡。

自從包包出世後午睡從我人生裡消失咁。

昨日午睡完後就諗今晚食乜好？其實我一早醃定本身整肉餅，但晌雪櫃見到條白蘿蔔後就感覺世界變得不一樣，我決定整蘿蔔餃子。

呢個係我早前睇台灣網站見到，我無深究個肉餡用乜組成，只係用自己喜好而定呢～

大少爺話佢好好味，臭包話唔食塊皮、我就覺得都ok。

裡面可以夾魚肉、總之你鍾意乜都可以夾入去，但唔包括豆豉鯪魚。

做法：

1. 將白蘿蔔一條去皮切薄片，最好薄到如圖中咁

2. 然後加兩茶匙鹽撈勻放置5分鐘，蘿蔔就會變軟的

肉餡：

豬肉 碎    $20咁上下

梅菜    少許

(其實我本身整梅菜肉餅所以先會加梅菜，大家可以加冬菇)   

洋蔥粒    少許

1. 調味用少許生抽、糖、生粉、麻油撈勻攪到微微起膠

2. 跟住就將豬肉放入蘿蔔片中摺起做成餃子型(sorry，我漏了影相)，放上個盤中蒸20分鐘

3. 蒸起後會有啲肉汁，將肉汁加少少蠔油、糖、胡椒粉、生粉 1茶匙加一湯匙水煮滾做成獻汁淋上面

4. 最後灑上蔥及芫茜便完成