（網上圖片）
世界唔會等你成長，亦唔會教你點樣成長。不過，你仍然會知道，如果有一天，有一種高度、氣度、力度、勁度，某時某刻若果你能夠達到的話，你會有一定成就；如果你能夠超越的話，你就會成為傳奇，成為一種有象徵意義的 benchmarking。
每個時代都有專屬的獨特產物和ICON，宜家supper moment、toNick，就好似以前的beyond、達明、太極。宜家拿度和費達拿，就好似以前的阿加斯同森柏斯。宜家judd trump同neil robertson，就好似以前的亨特利同奧蘇。宜家durant同curry，就好似以前的MJ同pippen。宜家apple同華為，就好似以前的nokia同motorola。宜家的陳奕迅同周柏豪，就好似以前的張國榮同張學友。宜家的B612同美圖，就好似以前的貼紙相機。以前玩電話line玩icq，宜家就微信、tinder同CMB……
當然，「一代不如一代/舊野永遠好過新野」呢類思維，幾時會都有。人心變左，做野手法變左，社會環境氣候唔同左，等唔等於宜家的生活，一定比以前優質；而產物的質素，又的確提升左呢？仲記等細個果陣，阿爸鍾意帶我去食一間好似叫做「陽光一代」或者「陽光XX」的pizza店，套餐有一塊pizza、粟米、雞翼、飲野，簡直係KFC的前身，我好鍾意食，成日叫佢帶我去食，仲記得全盛時期，係彌敦道地鋪都有幾間分店。後來，漸漸發現它們的分店，連同埋其他品牌例如馬里奧餐廳、歡樂天地之類都一齊無左，由冒險樂園、牛陣、茶木、譚仔所取代。
當新興的樂視急速彈起又衰亡，證明旁人同世界係唔會等你成長，亦唔會教你點樣成長，只會在你成長時坐順風車，之後有閃失就bye bye bye。唯有當你在徹底失敗左之後，先會醒覺、發現，原來就算做到benchmarking 都無用呀，因為paradigm shift，市場或者個結果，會教曉你，不得不迫你成長，去面對呢個好似好熟悉但卻又好陌生的世界。當百麗呢個紅極一時的鞋王國衰落到私有化，寫文章風格由八股文到文縐縐到好似王迪詩同葉朗晴咁過癮，每個benchmarking都overshadow左前一個benchmarking，成為一代代人的印記。不過，愈來愈少屬於香港的人、事和品牌，能成為能比人記住的benchmarking，呢樣野先最無奈。
