【食譜】煲仔週 2.0！香辣鹹魚芥蘭排骨煲

煲仔週唔好停，其實我開始好忙。

今星期得兩晚晌屋企，今晚同明晚都有event要去，但開得個頭話做煲仔週比大家就要盡力。

喜歡盡力去完成任務亦覺得係一種責任感，我記得第一份工老闆同我講：做人最重要負責任。

呢句說話我記到今日，負責任係好重要亦係成功踏腳石。

總覺得有一班人睇blog睇成十年，所以應承得就盡力去做吧。

今日個煲係……香辣鹹魚芥蘭排骨煲。

我覺得做煲仔菜要諗唔同材料點配搭，咁如果用豬肉又點整呢？

如果又要快手又要煲仔又要惹味又點呢？

呢個係好快手煲仔，有芥蘭晌裡面唔煮得太耐，而鹹魚又香辣椒又辣加埋應該得。

唔用鹹魚可以用馬拉盞去整，會仲好食！

材料：

腩排    $35

梅香鹹魚    半件(切粒)

芥蘭    半斤

蒜頭   3粒

乾蔥頭   5粒切片

薑    2片

蔥   少許

辣椒    3隻

調味：

生抽    少許

糖    1茶匙

水   半杯

生粉水   少少

做法：

1. 鹹魚切粒，用梅香整就最好.........我估

2. 排骨用生抽、糖、少許生粉撈勻醃 30分鐘咁上下

3. 然後爆香排骨備用

4. 爆香所有香料，加入鹹魚粒兜勻

5. 放入排骨兜勻，加少許生油、糖、少少老抽

6. 再放入芥蘭兜勻，贊酒

7. 加入半杯水煮滾加生粉水便可以識火

*因為我要影相，如果原煲做張相無咁好，所以我做完先轉煲！