【食譜】豆腐三文魚水潑煲

煲仔週進入尾聲，知唔知要決定成個星期做煲仔菜唔容易。

唔可以寫週街都係無創意食譜，但要做出賣相可以又真係易煮好味煲仔其實唔容易。

好似呢個「豆腐三文魚水潑煲」，呢個係三文魚魚鰭（亦即係魚鮫），咁通常日式餐廳就會做鹽燒。

呢個部位整得好會又脆又香但唔會腥。

我晌百佳買到一pack有10件，大家買唔到可以改用三文魚頭去做，但買到水潑就最好咁囉。

佢炆出來又骨又有肉火候較得好仲未脆添。

我今晚又要去個event，大少爺晚餐就係呢個囉！

其實我今次唔係用豆腐，身住深山又唔想出山洞，去超市望望望買了包類似素雞物體代替炸豆腐。

大家買到就用炸豆腐或豆卜啦。

材料：

三文魚魚鰭   10件

炸豆腐           4件

洋蔥     半個

蒜頭    2粒

薑    2片

蔥   少許

汁料：

蠔油     1湯匙

生抽   2茶匙

老抽     半茶匙

糖    1茶匙

酒    少許

水     半杯

生粉水    少許

做法：

1. 魚鰭洗淨去鱗(如有)，再抹乾水

2. 撲上生粉，份量剛好便可以多餘就拍走 

3. 放落鑊煎至金黃色，記住要用好熱鑊及好熱油

4. 煎脆佢

5. 爆香薑、洋蔥、蔥、辣椒、豆腐(大家唔好學我，要用炸豆腐)兜勻

6. 將所有汁料撈勻，倒落鑊煮滾落少少生粉水

7. 最後先放三文魚快手兜勻就完成

因為我要影相，所以做到最尾步驟先放上煲仔，大家可以一次過用煲仔做的。