【食譜】日本皇帝蟹拆肉！魚翅蟹肉灌湯餃

包包早幾日突然病了，星期六日都係留晌屋企。

星期日有帶過佢去西貢行下玩下泡泡曬下太陽，之後都係晌屋企。

近來好想整 灌湯餃，因為鍾意食於是好想試下次，本身買定水餃皮整但係又唔服氣喎，就自己整個皮。

當然個皮係失敗啦，又厚啦又唔關事咁。

但你又唔可以唔服我，因為個味又好唔錯。

真係用心製作，我用上日本皇帝蟹拆肉，所以呢個正式名係：魚翅蟹肉灌湯餃 。     

魚翅當然係用素翅啦啦啦！你估我未比人鬧過咩？老實講丫，一個寫過千個食譜嘅人點會無失敗過。

個皮唔寫喇，大家用水餃皮啦！個餡就可以照寫，配埋個雞湯係ok的。

材料：

個餃入面有素翅、蝦肉、冬菇粒粒、蟹肉、瑤柱，仲有雞肉

做法：

個雞肉切粒粒加少許鹽、生粉去醃，然後將所有材料撈勻

份量方面就自己喜好

好落本的，用日本皇帝蟹拆肉

咁撈好材料後就包入皮內，呢幾隻真係唔靚

雞湯我用盒裝低鹽清雞湯(超市有售)，再加浸瑤柱既水，加鹽就做成上湯喇

將隻餃放入碗，再加上湯然後就蒸佢20-25分鐘就完成

加少少紅醋就更好！餡料加埋個上湯同街外食既好似呢