（網上圖片）
之前，朋友唔開心，一齊出來吹吓水，仲即興走左去唱K，去到K房，發覺市道都真係好麻麻，黃金時間都無咩人，而且，消費群都老化得好快，根本上宜家年輕的朋友都唔會去唱K，個個都係我地啲中佬熟女，連大陸錢櫃都搞唔掂，唔知香港K場仲可以頂幾耐？
以前，就話無咩地方可以玩音樂同唱歌，宜家有唱歌神器，只要有個mon有塊pad就可以busking，又可以在app直播，邊唱邊呃like邊收禮，有fan屎有face屎仲有錢，比起在封閉的密室內唱歌，過癮幾多呀！
跟住，回到家，諗諗吓，究竟我果陣時的那些年、小幸運係咩呢，所以就在facebook打左幾隻字。
「謝謝你們出現在我的青春裡。
逝去的，追不來，悔不該。
走了，要走，就走，都走了。
『青春是段跌跌撞撞的旅行
擁有著後知後覺的美麗』
多美的詞。」
仲附上了K房、Suede和籃球圖片各一張。
如果要再加的話，因為太長，起碼要加有吳群立和威拿的南華、巴貝利和譚拔士、李健和用波省球證、有巴治奧的意大利、有柏金的阿仙奴、初出道的奧蘇利雲對亨特利、有MJ的NBA、香港四大天王、蠟筆小新、slam dunk、周星馳、古惑仔……
要記著一個時代的燦爛與豐盛，除了是經濟和政治事件之外，便是這個時代所產出的流行文化、音樂、電影、運動等等，人會記住這些有多深、有多久、有多重視，就是憑證。文化植根在人心，文化底蘊涵養在社會之中。
雖然宜家好少人出街唱K，好少人買書黎睇，好少人去機鋪打機，但唔等於現在的人唔鍾意唱歌、唔喜歡知識、唔愛打機，而係方法同追求的過程唔同左，所以宜家在商場裡面有入20蚊唱半個鐘的K室、有infographic、有手遊，可以共享，又可以隨時下線，比你見到我唱歌，但你又唔知我唱咩，開放得黎又有點privacy，就係宜家個style。
之前，寫過，「失去」本身不是最可怕，病態地堅持追逐失去的，才可怕。改變亦是，如果成日都拒絕改變，覺得所有transformation都係evil thing的話，咁就好難有成長啦！張國榮好，薜之謙都好。MJ好，LBJ都好！
