【甜品食譜】夏日的甘味！咖啡奶凍

由細到大都好喜歡啫喱，特別係紅色口味，咁多年都無乜變過。

晌我大約7、8歲時，有次爸爸帶我去銅鑼灣翡翠明珠戲院睇 King Kong(好明顯係佢先會懂欣賞)，戲中有一幕血淋淋情節，咁我當時都唔識去驚。

但睇完戲後爸爸又帶我去食啫喱，如是者我又揀紅色口味，結果我食唔落因為想起那血淋淋情節。

佢從來都唔會知原來我當時好怕呢一幕，細個時我從來唔會講出感受，喜、怒、哀、樂都唔會宣於口，只會靜靜放心事晌心裡面保存直到依家。

當時隔了一個時間，我又再重新再食紅色啫喱直到大個，近呢一年我開始好怕甜，好耐無再食啫喱。

上年整 broken jelly比小朋友食仲衍生埋咖啡味道，估唔到我近日想食嘅係呢個味道，帶甜又帶咖啡香又甘甘地。

上年寫過食譜，但唔知點解我覺得上年個咖啡太太濃，所以再研究多次呢個又剛剛好。

寫食譜最重要唔好原地踏步，唔同時間去做都有唔同改善空間。

咖啡凍

材料：

即溶咖啡粉   1湯匙

1.5湯匙糖  (始終係做果凍要帶少許甜)

熱水        300ml

魚膠片或粉   15g (兩者份量相同)

做法：

１魚膠片用冰水浸軟身，即溶咖啡粉用熱水沖好，趁熱加糖及浸軟既魚膠片

２放入盒中雪2小時以上    

３切粒，可以成不規則形狀

奶凍層

材料：

奶   100ml

椰汁    200ml

糖     2湯匙或自己調較甜味

魚膠片或粉   10g (兩者份量相同)

做法：

１奶+糖座熱，再加入魚膠片攪溶後倒入椰汁攪勻

２奶漿倒入咖啡粒中，輕輕將底既啫喱撥鬆至平均分佈盒中，雪4小時以上便完成